საქართველოს ფოლკლორის სახელმწიფო ცენტრისა და კულტურისა და ძეგლთა დაცვის სამინისტროს ორგანიზებით, საქართველოს ფოლკლორის 2015–2016 წლების ეროვნულმა ფესტივალმა სტარტი 4 ივლისს აიღო. ფესტივალი ორ ტურად ჩატარდება, პირველი ტური აღმოსავლეთ საქართველოს რეგიონებს მოიცავს და 25 ივლისამდე უნდა დასრულდეს, მეორე ტური კი სექტემბრიდან დაიწყება და დასავლეთ საქართველოში გადაინაცვლებს.
საქართველოს ფოლკლორის ეროვნული ფესტივალის ფარგლებში სამცხე–ჯავახეთის ყველა მუნიციპალიტეტის წარმომადგენლები 16 ივლისს მესხეთის სახელმწიფო დრამატული თეატრში შეიკრიბნენ.
თეატრის ფოიეში სახვითი ხელოვნების ნამუშევრების გამოფენა მოეწყო. მასში მონაწილეობა რეგიონის თითქმის ყველა მუნიციპალიტეტის წარმომადგენლებმა მიიღეს.
„მინანქარი, საიუველირო ნაწარმი, შანდლები და მინის სკულპტურები მაქვს წარმოდგენილი. დაახლოებით 20 წელია, რაც ამ თემაზე ვმუშაობ. პერიოდულად იყიდება ჩემი ნამუშევრები, ფასი ნამუშევარის სირთულისა და მხატვრული დონის მიხედვით განისაზღვრება“, – ამბობს ომარ სხულანძე.
ფოლკლორის სახელმწიფო ცენტრის სახვითი და გამოყენებითი ხელოვნების მიმართულების ხელმძღვანელი ცისანა მარიდაშვილი სამცხე–ჯავახეთის რეგიონიდან წარმოდგენილი ნამუშევრებით კმაყოფილია.
„კახეთის მერე, ყველაზე კარგად სამცხე–ჯავახეთი გამოვიდა. პირველ რიგში რაოდენობა ბევრია, თითქმის ყველა მუნიციპალიტეტია წარმოდგენილი და თან ძალიან საინტერესო ნამუშევრები აქვთ“, – ამბობს იგი და ამატებს, რომ დღევანდელ გამოფენაზე საუკეთესო ნამუშევრები შეირჩა, რომლებიც დაინომრა და შემდგომ დასკვნით ნაწილში წარდგენილი იქნება თბილისში, ჟიურის წინაშე.
გამოფენის პარალელურად ფოლკლორული და ქორეოგრაფიული ანსამბლები, ასევე ინდივიდუალური შემსრულებლები საკუთარ ნამუშევრებს ჟიურს აცნობდნენ.
„არსებობს ბევრი ადამიანი, რომელიც ინახავს წმინდა ფოლკლორს, თხზავს ლექსებს, მღერის მესხურ სიმღერას, სწორედ ეს ადამიანები შეიკრიბნენ და წარმოადგინეს თავიანთი შემოქმედება. დღეს წარმოდგენილია ცეკვა, სიმღერა, ზეპირსიტყვიერება და ასევე გამოფენა სახვითი და გამოყენებითი ხელოვნების სხვადასხვა დარგის. წლევანდელი ფესტივალი გამორჩეულია იმით, რომ დაემატა მგალობელთა გუნდები“, – ამბობს ფოლკლორის სახელმწიფო ცენტრის რეგიონული სამსახურის კოორდინატორი მიხეილ ჯავახიშვილი.
მისივე თქმით, ჟიური დაკომპლექტებულია კომპეტენტური ადამიანებით, რომლებიც დიდი ხანია ჩართული არიან ქართული ფოლკლორის სამსახურში.
საქართველოს ფოკლორის ეროვნული ფესტივალის დასკვნითი ნაწილი 2016 წელს გაიმართება.
„საბოლოოდ თბილისში უნდა მოგროვდეს ყველა ის ადამიანი, რომელმაც დააკმაყოფილა ჟიურის მოთხოვნები და მაღალი ქულები მიიღო. გაიმართება საინტერესო კონცერტი, სადაც მთელი საქართველოდან მონაწილე პიროვნებები, სხვადახვა დარგის წარმომადგენლები წარსდგებიან თბილისელი მაყურებლის წინაშე და გამოვლინდებიან გამარჯვებულები, რომლებსაც სპეციალური პრიზები გადაეცემათ“, – ამბობს მიხეილ ჯავახიშვილი და ამატებს, რომ მონაწილეებს კიდევ ბევრი საინტერესო რამ ელით.
[თამარ თოთაძე, ახალციხე]