მდინარე ოთის კალაპოტის რეაბილიტაცია ორ თვეში დასრულდება

მდინარე ოთის ნაპირსამაგრ სამუშაოებს შპს „ნუკია“ შეასრულებს. აღნიშნულმა კომპანიამ სამუშაოები ორი თვის ვადაში უნდა დაასრულოს.

მდინარე ოთის ნაპირსამაგრი სამუშაოებისთვის რეგიონული განვითარების სამინისტროდან მილიონამდე ლარი გამოიყო. სამუშაოები 4 ნაწილად გაიყო და 4 შპს: „ქილდა“, „კ და კომპანია“, „ნუკია“ და „ ახაშენი“ ასრულებდა.

1.700 მეტრზე მოეწყო გაბიონები, რეაბილიტაცია ჩაუტარდა 9 ხიდს, აქედან ერთი ხიდი სოფელ იდუმალაში გაკეთდა. ასპინძის მუნიციპალიტეტში განმარტავენ, რომ მიუხედავად ჩატარებული სამუშაოებისა, დაახლოებით 300 მეტრზე გაბიონები გასაკეთებელი დარჩა. ამიტომ მუნიციპალიტეტმა ტენდერი გამოაცხადა.

შეგახსენებთ, რომ გასული წლის 12 მაისს ძლიერი წვიმის შედეგად ადიდებულმა მდინარე ოთისწყალმა პრობლემები შეუქმნა სოფელ ოთისა და დაბა ასპინძის მოსახლეობას. მოვარდნილმა ნიაღვარმა რამდენიმე საათით ჩაკეტა ასპინძა-ახალციხის ცენტრალური მაგისტრალი.

სტიქიის შედეგად განადგურდა მდინარის კალაპოტის მიმდებარედ არსებული ნათესები, დაზიანდა საგზაო ინფრასტრუქტურა და ხიდები. ღვარცოფი შევარდა საცხოვრებელ სახლებსა და ეზოებში.

[თინათინ ზაზაძე, ასპინძა]