ახალციხე უეფას სიმბოლოებს უმასპინძლებს

საქართველოს ფეხბურთის ფედერაციის ორგანიზებით, მსოფლიო პრაქტიკიდან გამომდინარე ევროპის სუპერთასის ფინალის აღსანიშნავად, რომელიც ბარსელონასა და სევილიას შორის 11 აგვისტოს თბილისში, დინამო-არენაზე უნდა გაიმართოს, საქართველოს ქალაქებსა და რეგიონებში უეფას სამი ტრიუმფალური სიმბოლო – სუპერთასი, ჩემპიონთა ლიგის თასი და ევროპის ლიგის თასი ჩავა.

თამაშამდე, ოლიმპიური ჩირაღდნის მსგავსად, სამივე თასი თბილისში ჩამოსვლამდე, ჩავა ყველა რეგიონში და მათ შორის სამცხე-ჯავახეთში, ქალაქ ახალციხეში.

ფეხბურთის ფედერაციის ორგანიზებით ასევე, მოეწყობა მინი სპორტულ მოედანი, სადაც ახალგაზრდებს შესაძლებლობა ექნებათ ითამაშონ ცნობილ ქართველ ფეხბურთელებთან. სუპერ თასის საქართველოს ღონისძიებების სახე და ეგრეთ წოდებული დესპანი იქნება ფეხბურთელი გიორგი ქინქლაძე.

გარდა ამისა, სპეციალურად მოწყობილ მინი-სცენაზე განთავსდება სამივე თასი, სადაც ყველა მსურველს ექნება მათი დათვალიერებისა და სამახსოვრო სურათების გადაღების შესაძლებლობა. თასებს პირველად 3 ივლისს ფოთში უმასპინძლეს.

როდის ჩამოვა უეფას სიმბოლოები ახალციხეში, ამ ეტაპზე თარიღი დასაზუსტებელია. როგორც კი ცნობილი გახდება, "სამხრეთის კარიბჭე" აუცილებლად გაცნობებთ.

[sknews.ge]