ახალციხეში სამაგისტრო გამოცდაზე 55 აპლიკანტი გამოცხადდა

მაგისტრანტობის მსურველებმა გამოცდა, ლოგიკურ მსჯელობასა და რაოდენობრივ მსჯელობში, B–ტიპის ტესტი ჩააბარეს. გამოცდაზე რეგისტრაცია 15:00 საათზე, საგამოცდო პროცესი კი, 16:00 საათზე დაიწყო.

გამოცდის ხანგრძლივობა 2 საათი და 25 წუთი იყო.

ახალციხის საგამოცდო ცენტრის ხელმძღვანელის გელა ინასარიძის თქმით, საგამოცდო პროცესმა ექსცესების გარეშე ჩაიარა.
საერთო სამაგისტრო გამოცდაზე, მიმართულებების მიხედვით, შეთავაზებულია სამი სხვადასხვა - A, B და C ტიპის ტესტი. მაგისტრანტობის თითოეულმა მსურველმა, ამ სამიდან, გამოცდაზე უნდა შეასრულოს მხოლოდ ერთი ტიპის ტესტი.

გამოცდები ოთხი ნაწილისაგან შედგება: წაკითხულის გააზრება, ანალიტიკური წერა, ლოგიკური მსჯელობა, რაოდენობრივი მსჯელობა.

სამაგისტრო პროგრამაზე ჩარიცხვის კონკურსში მონაწილეობის გაგრძელებისათვის აუცილებელია საერთო სამაგისტრო გამოცდის ბარიერის დაძლევა, რაც გულისხმობს საგამოცდო ტესტის 4 ნაწილიდან რომელიმე 3-ში მაინც კომპეტენციის მინიმალური ზღვრის გადალახვას.
საერთო სამაგისტრო გამოცდაზე მხოლოდ 100 % - იანი დაფინანსება გაიცემა.

წელს, მთლიანად საქართველოში, საერთო სამაგისტრო გამოცდისათვის რეგისტრაცია 12000-მდე კანდიდატმა გაიარა; გამოცდები 24 ივლისს დასრულდება.

მაგისტრანტებს კიდევ ოთხი გამოცდა აქვთ ჩასაბარებელი.

22 - ივლისი (მეორე სესია) - წაკითხულის გააზრება, ანალიტიკური წერა (ტესტის ტიპი - A);
23 - ივლისი (პირველი სესია) - წაკითხულის გააზრება, ანალიტიკური წერა (ტესტის ტიპი - C);
23 - ივლისი (მეორე სესია) - ლოგიკური მსჯელობა, რაოდენობრივი მსჯელობა (ტესტის ტიპი - A);
24 - ივლისი (პირველი სესია) - ლოგიკური მსჯელობა, რაოდენობრივი მსჯელობა (ტესტის ტიპი - C).

[ლუბა გიორგაძე, ახალციხე]