ახალციხის მერია: ’ხისჯოხიანი შადრევნის ფოტო მიზანმიმართული პროვოკაციაა’

„ქალაქ ახალციხის მუნიციპალიტეტის მერიის ადმინისტრაციის შენობასთან ( შოთა რუსთაველის ძეგლთან ) არსებულ შადრევნის მილში ხის ნაჭერის დაცობის შესახებ სოციალურ ქსელში გავრცელებული ფოტოები მოსახლეობას არაზუსტ ინფორმაციას აწვდის. ვადასტურებთ იმ ფაქტს, რომ აღნიშნული შადრევნის მოვლა-პატრონობა შპს „კეთილმოწყობას“ ევალება. ახალციხის მერიის ინფორმაციით, ეს ფაქტი მიზანმიმართულად მერიის დისკრიმინაციისთვის არის გამიზნული, რადგან არსებულიდან გამომდინარე შადრევანს გააჩნია წყლის ჩამკეტი და აუცილებლობას არ წარმოადგენს რაიმე სხვა ნივთით წყლის გადაკეტვა. მოსახლეობას ვთხოვთ გამოიჩინონ კეთილგონიერება და არ აყვნენ მიზანიმართულ პროვოკაციას“, - ნათქვამია განცხადებაში, რომელიც ახალციხის მერიის ფეისბუქის გვერდზე დღეს დაახლოებით 18:00 საათზე გამოქვეყნდა.

განცხადებას თან ერთვის შადრევნის ფოტო, რომელსაც ჯოხი აღარ აქვს.

მერიის განცხადების თანახმად, ფოტო მოსახლეობას არაზუსტ ინფორმაციას აწვდის და ეს ფაქტი მიზანმიმართულად მერიის დისკრიმინაციისთვისაა გამიზნული. საინტერესოა რას გულისხმობენ მერიაში, ვინაიდან, ფოტოები სოციალურ ქსელში ყოველგვარი ინფორმაციის გარეშე გავრცელდა.

მოგვიანებით, ეს ფოტო გამოაქვეყნა „სამხრეთის კარიბჭემ“, როგორც დღის ფოტო, თუმცა, რაიმე ტიპის ინფორმაცია, ვინ დაუცო ხის ჯოხი შადრევანს და აქვს თუ არა ამას რაიმე კავშირი მერიასთან ფოტოამბავში არ ყოფილა. ფოტოამბავში არც იმის შესახებ დასმულა კითხვა, შპს „კეთილმოწყობას“ ევალება თუ არა ამ შადრევნის მოვლა–პატრონობა.

[ნინო ნარიმანიშვილი, ახლციხე]