‘თბილისო, სამცხე-ჯავახეთი თქვენთანაა’ - ახალგაზრდები თბილისის დასახმარებლად

საქველმოქმედო ღონისძიება გუშინ, 20 ივნისს, საღამოს შედგა. წვიმიანი ამინდის გამო ახალგაზრდებმა მცირე წარმოდგენები თეატრის მიმდებარე ტერიტორიაზე გამართეს. აქვე დადგმული იყო ყუთები შემოწირულობის შესაგროვებლად და დადიოდნენ ახალგაზრდები წარწერებიანი ფურცლებით: „თბილისო, სამცხე-ჯავახეთი თქვენთანაა“.

სამოქალაქო პროგრამა „მომავლის თაობის“ კურსდამთავრებულები 13 ივნისის სტიქიის შედეგად დაზარალებული თბილისის დასახმარებლად მთელი კვირის განმავლობაში აგროვებდნენ პროდუქტებს. გუშინ, დღის განმავლობაში, მათ ეს პროდუქტიც გადაახარისხეს.

აქციაში რეგიონის მასშტაბით არაერთი სკოლა იყო ჩართული. მათ შორის, ასპინძის მუნიციპალიტეტის სოფელ რუსთავის საჯარო სკოლის სამოქალაქო კლუბი „ხელი ხელს“. კლუბის წევრებმა მოსახლეობაში 271 ლარი შეაგროვეს დაზარალებულთა ფონდში გადასარიცხად.

ნინოწმინდის მუნიციპალიტეტის სოფელ ჰეშტიის N1 საჯარო სკოლის მოსწავლეებმა და მასწავლებლებმა კი საკუთარი სახსრებით დაზარალებულებისთვის საკვები პროდუქტები და სარეცხი საშუალებები შეიძინეს.





[მანანა სარაშვილი, ახალციხე]