შსს-მ ახალციხის საჯარო სკოლებში სამართლებრივი კულტურის გაკვეთილი ჩაატარა

სამართლებრივი კულტურის გაკვეთილები ახალციხის სკოლებში შინაგან საქმეთა სამინისტროს, განათლებისა და მეცნიერების სამინისტროს და საერთაშორისო ორგანიზაცია „PH INTERNATIONAL“-ის ერთობლივ პროექტ - „სამართლებრივი განათლების პროგრამის“ ფარგლებში ტარდება.

შსს-ს ინფორმაციით, უბნის ინსპექტორ-გამომძიებლები, რომლებიც სამართლებრივი კულტურის გაკვეთილებს ატარებენ, აღნიშული პროგრამისთვის სპეციალურად არიან გადამზადებული.

"სამართლებრივი კულტურის გაკვეთილები ინტერაქტიულია და თამაშებს მოიცავს. პროგრამა მოსწავლეებში სამართლისა და მართლმსაჯულების სფეროში მათი უფლებების და პასუხისმგებლობის შესახებ ცოდნის ამაღლებას ისახავს მიზნად. სწავლება მე-9 კლასის მოსწავლეთათვის ტარდება შემდეგ თემებზე: სამართლებრივი კულტურის არსი და მნიშვნელობა; არასრულწლოვანი და კანონი; ძალადობა - ძალადობა ოჯახში, ბულინგი სკოლებში; მავნე ჩვევები და მათი სახიფათო შედეგებისგან თავდაცვა; ორგანიზებული დანაშაული (ტრეფიკინგი, ნარკოტიკებით და იარაღით უკანონო ვაჭრობა); სასამართლო სამართალწარმოება", – აცხადებენ შსს–ში.

პროექტი აშშ-ს სახელმწიფო დეპარტამენტის ანტინარკოტიკულ და სამართალდამცავ ორგანოებთან თანამშრომლობის საერთაშორისო ბიუროს ფინანსური მხარდაჭერით ხორციელდება. სამართლებრივი კულტურის გაკვეთილები ტარდება თბილისის, ქუთაისის, რუსთავის და ახალციხის საჯარო სკოლებში.

2013-2014 სასწავლო წელს პროგრამა ადგილობრივი უბნის ინსპექტორ-გამომძიებლების და სკოლის პედაგოგების მიერ საქართველოს 32 საჯარო სკოლაში განხორციელდა. სწავლება თბილისის მე-17, ახალქალაქის მე-5, ფოთის მე-5 და თელავის მე-5 საჯარო სკოლებში ჩატარდა.

[ნინო ნარიმანიშვილი, ახალციხე]