დავით კუბლაშვილის ადვოკატები გადაწყვეტილებას გაასაჩივრებენ

ადიგენის მუნიციპალიტეტის სოფელ ყარათუბანში, სამი ახალგაზრდის მკვლელობაში ბრალდებულს, დავით კუბლაშვილს, ახალციხის რაიონული სასამართლოს მოსამართლე გოჩა ჯეირანაშვილმა უვადო პატიმრობა შეუფარდა. სასამართლოს გადაწყვეტილებით, მსჯავრდებული ჯერ ხონის ფსიქიატრიულ სამკურნალო დაწესებულებაში იმკურნალებს, გამოჯანმრთელების შემდეგ კი საპატიმროში გადაიყვანენ.

კუბლაშვილის ადვოკატები მიიჩნევენ, რომ ახალციხის რაიონული სასამართლოს მოსამართლე გოჩა ჯეირანაშვილის გადაწყვეტილება უკანონო და დაუსაბუთებელია.

„ის ფაქტობრივი გარემოებები, რომლებსაც დაეყრდნო სასამართლო და მიუთითა განაჩენის დადგენის საფუძვლად, არის უსაფუძვლო. ფსიქიკური აშლილობა ნიშნავს, რომ შეიძლება პირი გამოჯანმრთელდეს. არავინ იცის ახალი ფაქტობრივი გარემოებებით როგორ ჩვენებას მისცემს, შეიძლება დადასტურდეს აფექტის მდგომარეობა, რაც საფუძველი გახდება განაჩენის გაუქმების“,– ამბობს ბრალდებულის ადვოკატი მაგული გოგლიძე.

გარდაცვლილის ახლობლები განაჩენით კმაყოფილი არიან, თუმცა ამბობენ, რომ დავით კუბლაშვილის გარდა საკადრისად უნდა დაისაჯოს მისი შვილი და ის მძღოლი, ვინც კუბლაშვილი შემთხვევის ადგილზე მიიყვანა.

შეგახსენებთ, რომ დღეს, 4 მაისს სამი ახალგაზრდის მკვლელობისთვის დავით კუბლაშვილს ახალციხის რაიონულმა სასამართლომ უვადო პატიმრობა მიუსაჯა.

[თინათინ ზაზაძე, ახალციხე]