რეგიონებთან ურთიერთობის დეპარტამენტს გიორგი ამაშუკელი უხელმძღვანელებს

საქართველოს მთავრობის ადმინისტრაციის ინფორმაციით, პრემიერ–მინისტრი ირაკლი ღარიბაშვილი რეგიონებთან და ადგილობრივ თვითმმართველ ორგანოებთან ურთიერთობის დეპარტამენტის ახალ ხელმძღვანელს გიორგი ამაშუკელს შეხვდა.

პრემიერ–მინისტრმა შეხვედრაზე აღნიშნა, რომ მთავრობის განსაკუთრებული ყურადღება რეგიონების განვითარებასა და რეგიონში არსებული პოტენციალის მაქსიმალურად გამოყენებაზეა მიმართული. ირაკლი ღარიბაშვილმა გიორგი ამაშუკელს დაავალა დაინტერესდეს ინფრასტრუქტურული პროექტების სამუშაოებით და აქტიურად ჩაერთოს რეგიონებში მიმდინარე პროცესებში.

გიორგი ამაშუკელი აქამდე საქართველოს რეგიონული განვითარებისა და ინფრასტრუქტურის მინისტრის პირველი მოადგილე იყო. დამთავრებული აქვს თსუ საერთაშორისო სამართლისა და საერთაშორისო ურთიერთობების ფაკულტეტი და ლივერპულის ჯონ მურსის სახელობის უნივერსიტეტი (დიდი ბრიტანეთი), მაგისტრის ხარისხი–სპეციალობა: ბიზნეს და კომერციული სამართალი.

[sknews.ge]