სამცხე–ჯავახეთის არაკონტროლირებად ნაგავსაყრელებზე მავნე ნივთიერებები აღმოჩნდა

ამის შესახებ სამცხე–ჯავახეთის სამხარეო ადმინისტრაციის წარმომადგენლებსა და რეგიონის მუნიციპალიტეტების გამგებლებს დღეს, 22 აპრილს, სამხარეო ადმინისტრაციაში გამართულ შეხვედრაზე აცნობეს.

შეხვედრა „დავასუფთაოთ საქართველოს – საზოგადოების ცნობიერების ამაღლება და მისი ჩართვა მყარი საყოფაცხოვრებო ნარჩენების მართვის გაუმჯობესების პროცესის“ პროექტის ფარგლებში გაიმართა. პროექტს ახორციელებს არასამთავრობო ორგანიზაციათა კონსორციუმი, რომლის შემადგენლობაში არიან: საქართველოს ბუნების მკვლევართა კავშირი „ორქისი“, საქართველოს მწვანეთა მოძრაობა/დედამიწის მეგობრები – საქართველო და მდგრადი განვითარების კავშირი „ეკოხედვა“.

შეხვედრაზე დეტალურად განიხილეს მყარი საყოფაცხოვრებო ნარჩენების მართვის სფეროში არსებული თანამედროვე სისტემები, საერთაშორისო პრაქტიკა და ევროკავშირის ქვეყნების გამოცდილება. გარდა ამისა, ორგანიზაციების ექსპერტებმა რეგიონში ჩატარებული კვლევის შედეგები წარადგინეს.

როგორც მყარი ნარჩენების მართვის ექსპერტი ხათუნა ჩიკვილაძე ამბობს, პროექტის ფარგლებში გარემოსდაცვითი არასამთავრობო ორგანიზაციის წარმომადგენლებმა ახალციხეში, მდინარე ქვაბლიანის ნაპირზე, ასპინძაში, სოფელ ფიას ტერიტორიაზე და ნინოწმინდაში, დიდი ხანჩალის შუა მონაკვეთში არსებული არაკონტროლირებადი ნაგავსაყრებიდან ანალიზები აიღეს.

„აღნიშნულ ტერიტორიებზე საკმაოდ საშიში ნივთიერებები აღმოჩნდა, კერძოდ, სოფელ ფიაში იყო ფონურზე მეტი ნიტრატების დაბინძურება, ქვაბლიანის ნიადაგში აღმოჩნდა კადნიუმი მაღლი და ტყვიის კონცენტრაცია მეტი, ვიდრე არის დასაშვები ნორმა. დღეს ამის შესახებ ვაცნობეთ, როგორც გამგებლებს, ასევე გუბერნატორის სახელზე დავწერეთ წერილი, რომ დროულად მოხდეს რეაგირება“, – ამბობს ხათუნა ჩიკვილაძე.

სამცხე–ჯავახეთის სამხარეო ადმინისტრაციაში ამბობენ, რომ ამ ინფორმაციას ყუარდღების გარეშე არ დატოვებენ და დროულად მოახდენენ რეაგირებას.

როგორც ასპინძის მუნიციპალიტეტის გამგებელი ლევან ცაბაძე ამბობს, არაკონტროლირებადი ნაგავსაყრელი ასპინძის მუნიციპალიტეტშიც სავალალო მდგომარეობაშია.

„უკვე წლებია ძველი ჭობარეთის ტერიტორიაზე არაკონტროლირებადი ნაგავსაყრელი არსებობს, რომელსაც მარტო ჩვენი სახსრებით ვერაფერს ვუხერხებთ. თვეში ერთხელ აღნიშნულ ტერიტორიაზე დასუფთავების აქციას ვმართავთ, თუმცა მარტო ეს საკმარისი არ არის. საჭიროა ამ ნაგავსაყრელის გაუქმება“, – განაცხადა ცაბაძემ.



[მანანა სარაშვილი, ახალციხე]