ახალციხის მუნიციპალიტეტის გამგეობა ახალ მანქანებს ყიდულობს

2015 წელს ახალციხის მუნიციპალიტეტის გამგეობა 2 ჯიპს და 2 დასუფთავების მანქანას შეიძენს. 2 ჯიპიდან ერთს გასული წლის ბიუჯეტში გათვალისწინებული თანხით შეიძენენ.

ახალციხის მუნიციპალიტეტის გამგებლის ზაზა მელიქიძის განმარტებით, ტენდერის ჩაშლის გამო ავტომობილის შეძენა ვეღარ მოხერხდა. აღნიშნული მანქანისთვის 50.000 ლარია გამოყოფილი.

2014 წელს გამოცხადებული ტენდერით ყიდულობენ დასუფთავების სპეციალიზირებულ მანქანასაც, რომელიც ახალციხის თვითმმართველობას 20 თებერვლამდე ჩაბარდება. 9 კუბ.მეტრი ტევადობის დასუფთავების მანქანის შესაძენად 114.000 ლარია გამოყოფილი.

დასუფთავების მინი თვითმცლელი მანქანის და საკრებულოსთვის მაღალი გამავლობის ჯიპის შეძენა იგეგმება 2015 წლის ბიუჯეტიდან. ამისთვის 25.000 ლარი გამოიყოფა.

„ეს თანხები არის სავარაუდო. ტენდერი გამოცხადდება და შესაბამისად დააკლდება“, – განაცხადა ზაზა მელიქიძემ.

გასული წლის ბიუჯეტიდან უკვე შეძენილია ექსკავატორი, რომელიც ტენდერში გამარჯვებულმა ფირმამ „თეგეტა მოტორსმა“ შეიძინა. ამისთვის ბიუჯეტიდან 155.000 ლარი გამოიყო. ტექნიკა ახალციხის მუნიციპალიტეტის გამგეობას ორი დღის წინ გადაეცა.




[თინათინ ზაზაძე, ახალციხე]