‘მე ვარ შარლი ებდო’ – ახალციხეში სოლიდარობის აქცია გაიმართა [Photo]

ტრასნფარანტებით: „მე ვარ შარლი ებდო“, „ჩვენ ვგმობთ ძალადობას“, – ახალციხის ცენტრში დღეს, 9 იანვარს, ჟურნალისტები, სტუდენტები, საჯარო უწყებების პრესსამსახურისა და ადგილობრივი არასამთავრობო ორგანიზაციების წარმომადგენლები შეიკრიბნენ.

აქცია „სამხრეთის კარიბჭემ“, სოციალური ქსელის მეშვეობით დაგეგმა.

„ყველაზე ცუდი, რაც ხანდახან ჩვენ გვჭირს, ინდიფერენტულობა, სოლიდარობის განცდის არქონაა. ხანდახან ადამიანები ვფიქრობთ, რომ თუ კონკრეტულად ჩვენ არ გვეხება საკითხი, იქ ჩვენი საქმე არ არის. სინამდვილეში სულაც არ არის ასე. არ ინდა მოვიქცეთ ისე, რომ გერმანელი პასტორის არ იყოს, ჩვენ რომ მოგვადგებიან, ხმის ამომღები აღარავინ იყოს“, – ამბობს „სამხრეთის კარიბჭეს“ მთავარი რედაქტორი ნინო ნარიმანიშვილი.

ადგილობრივი ტელეკომპანია „მე–9 არხის“ ჟურნალისტი თაკო ფეიქრიშვილი ფიქრობს, რომ მსგავსი ფაქტს სათანადო რეაგირება ექნება და მსოფლიოს სხვა ქვეყნებში მიმბაძველები არ გამოჩნდებიან: „ვგმობთ ძალადობას და ვფიქრობთ, რომ ასეთ შემთხვევაში სოლიდარობა აუცილებელია“.

ახალციხის ცენტრში, ჟურნალისტებთან ერთად მომხდარი დაგმო და სოლიდარობა გამოუცხადა ფრანგ ხალხს არასამთავრობო ორგანიზაცია „ახალციხის ახალგაზრდული ცენტრის“ დირექტორმა მაკა სუდაძემ: „ვგმობ ყოველგვარ ძალადობას ჟურნალისტებზე, პირადი განწყობების გამო რაიმე ქმედება ასეთი ფორმით არ უნდა ისჯებოდეს. და ვფიქრობ, რომ მსგავს შემთხვევებს სახელმწიფო უნდა არეგულირებდეს“.

დღეს ჟურნალისტებთან ერთად იდგნენ არასამთავრობო ორგანიზაცია „დემოკრატ მესხთა კავშირის“ წარმომადგენლები და ორგანიზაციის ბაზაზე არსებული ახალგაზრდული კლუბის წევრები; სამცხე–ჯავახეთის სახელმწიფო უნივერსიტეტის სტუდენტები; „სამართლიანი არჩევნების“ კოორდინატორი და სამცხე–ჯავახეთის სამხარეო ადმინისტრაციისა და ახალციხის მუნიციპალიტეტის გამგეობის პრესსამსახურის თანამშრომლები.

აქციის ყველა მონაწილე დღეს ერთსულოვანი იყო: „ძალადობა, ყველანაირი ფორმის, დასაგმობია! სოლიდარობა კი აუცილებელი“.

შეგახსენებთ, 7 იანვარს, ჟურნალ Charlie Hebdo-ზე თავდასხმა მოხდა, რის შედეგადაც 12 მოქალაქე დაიღუპა: გაზეთის მთავარი რედაქტორი, ოთხი კარიკატურისტი და პოლიციელები. თავდასხმა მოჰყვა ჟურნალის მიერ გამოაქვეყნებულ ტვიტს,
ISIS-ის ლიდერის აბუ ბაქარ ალ ბაღდადის კარიკატურას.

საფრანგეთში მომხდარი ტერორისტულ აქტად შეფასდა და 8 იანვარი საფრანგეთში ეროვნული გლოვის დღედ გამოცხადდა.

რედაქციაზე მომხდარ თავდასხმას გამოეხმაურნენ საქართველოს პირველი პირები, საქართველოს პრემიერ-მინისტრმა და პრეზიდენტმა ფრანგ ხალხს სოლიდარობა გამოუცხადეს.სოლიდარობის მიზნით თბილისში აქცია გამართეს მოქალაქეებმა.
















[ნინო ნარიმანიშვილი, ახალციხე]