უკრაინის მხარდასაჭერად ახალციხეში აქცია გამართეს [Photo]

მთავარი → ფოტოამბავი 21.02.2014

"თავისუფლება უკრაინელ ხალხს!"; "სოლიდარობა უკრაინას"; "Solidarity with The Ukrainian People"! - ამ ტრაფარეტებით ახალციხეში ევრომაიდანზე შეკრებილ უკრაინელ მომიტინგეებს სოლიდარობა გამოუცხადეს.

სოლიდარობის აქცია, რომლის იდეის ავტორი ორგანიზაცია "ტოლერანტი" იყო, სოციალური ქსელით, სპონტანურად დაიგეგმა. შესაბამისად, აქცია მასშტაბური არ იყო. სოლიდარობის მიზნით, 25-მდე ადამიანი ქალაქის ცენტრში უკრაინის დროშის ფერებში დამზადებული გულსაბნევებით გამოვიდა. ამ ფორმით აქციის მონაწილეებმა ძალადობა დაგმეს.

”გვინდოდა გამოვხმაურებოდით უკრაინაში მიმდინარე მოვლენებს და სოლიდარობა გამოგვეცხადებინა უკრაინელი ხალხისთვის. მთავარია რომ აქცია შედგა, მონაწილეთა რაოდენობას მნიშვნელობა არ აქვს, თუმცა, ურიგო არ იქნებოდა, სოლიდარობის განცდა მეტ ადამიანს გასჩენოდა. ეს მხოლოდ უკრაინის ტრაგედია არ არის”, - ამბობდნენ აქციის მონაწილეები.

შეგახსენებთ, საპროტესტო აქციები კიევში 2013 წლის ნოემბერში დაიწყო. პროტესტი უკრაინის მთავრობის მიერ ევროკავშირთან ასოცირების ხელშეკრულების ხელმოწერაზე უარის თქმამ გამოიწვია. ვითარება განსაკუთრებით 2014 წლის 18 თებერვალს დაიძაბა. 21 თებერვლის მდგომარეობით, უკრაინის ჯანდაცვის სამინისტროს ინფორმაციით, 18 თებერვლის შემდეგ გარდაცვლილია 77 ადამიანი, სამედიცინო დაწესებულებებს მიმართა 571-მა დაზარალებულებმა. უკრაინაში მიმდინარე მოვლენებს ორი ქართველი, დათო ყიფიანი და ზურაბ ხურცია ემსხვერპლა.

უკრაინის მხარდასაჭერად ახალციხეში აქცია გამართეს [Photo]