გოგაშენში ორმაგ მკვლელობაში ბრალდებულისა და გარდაცვლილების ნათესავები ერთმანეთს დაუპირისპირდნენ

ბრალდებულის დის მაგული იაკობაძის განცხადებით, მისმა სიძემ (შვილის ქმარმა) გარდაცვლილის ძმის, ილარიონ გოხაძის სახლთან ცხვარი ჩაატარა. ამ დროს მის სიძეს, სრულიად უმიზეზოდ, ილარიონ გოხაძე გამოუვარდა და დაარტყა.

„ქვებში დაეცა და საკმაოდ მძიმედ დაშავდა. ყვირილი რომ ატყდა, მეც გარეთ გავედი და დავინახე რომ ძირს ეგდო. ავაყენეთ და სახლში შემოვიყვანეთ. ეს ყველაფერი ჩემმა დისშვილებმაც დაინახეს, - ყვება იაკობაძე და ამატებს, რომ ამის შემდეგ პოლიციას შეატყობინეს, მერე კი დაშავებული საავადმყოფოში გადაიყვანეს.

მომხდარს სხვაგვარად ყვება ილარიონ გოხაძე. მისი თქმით, მისი სახლის წინ სოფლის ცენტრალური გზა გადის და აქ იაკობაძეების სიძე წყლის დასალევად ცხვარს ატარებს: „ჩემ სახლს რომ მოუახლოვდებიან, მაშინ იწყებენ სტვენას და ყიჟინას. ამასთან ერთად „ხლაფუშკებსაც“ აფეთქებენ. ცხვარს რომ არ დაუყვირო, თავისითაც მიდის. ამიტომ მგონია, რომ ასე განგებ, ჩემს პროვოკაციაზე წამოსაგებად იქცევიან, თან ასეთი რამ ზედა უბანში არ ხდება“.

ილარიონ გოხაძის განცხადებით, იმ დღეს, როცა ინციდენტი მოხდა, იგი იაკობაძეების სიძეს გზაზე შემთხვევით შეხვდა: „სახლის წინ მაღაზიის ნანგრევი მაქვს, იქიდან გამოვდიოდი და რომ დამინახეს, ყიჟინას მოუმატეს. მივედი და ვთხოვე, ასე ნუ იქცევით, ვღიზიანდები–მეთქი, მაგრამ მან გინება დამიწყო, შენ სტვენა როგორ უნდა დამიშალოო. ჯერ სომხურად შემაგინა, მერე ქართულად შენი მკვდარი დაც და შენი ცოცხალიცო. თავი ვეღარ შევიკავე და ხელი ვკარი, წარბარბაცდა და დაეცა“.

გოხაძის განმარტებით, ამის შემდეგ იგი მისმა მეუღლემ სახლში შეიყვანა. მოგვიანებით, კი მათთან პოლიცია მივიდა: „ახსნა განმარტება დამაწერინეს და ალბათ ახალი წლის შემდეგ გამოძიებას დაიწყებენ“.

შემთხვევა გოგაშენში 30 დეკემბერს, დაახლოებით 18:00 საათზე მოხდა. როგორც გოხაძე აცხადებს, მიუხედავად მომხდარისა, ცხვრის ატარებისას იაკობაძეებმა მის სახლთან ყიჟინა მეორე დღეს, 31 დეკემბერს დილითაც დაიწყეს.

„დავიღალეთ, სახლიდან გარეთ ვეღარ გავსულვართ, ერთ ოთახში გამოკეტილები ვზივართ. მათ უნდათ, რომ ჩემი ქმარი დაიჭირონ. ამ ყველაფერს სპეციალურად გვიწყობენ და თან გვწყევლიან“, - ამბობს გოხაძის მეუღლე ლალი მაისურაძე.

იაკობაძეები კი გოხაძისა და მისი მეუღლის ნათქვამს კატეგორიულად უარყოფენ.

„ცენტრალური გზაა და ცხვარს რომ აატარებ, ან ხელს აუქნევ და ან ქვას ესვრი, ისევ იმიტომ, რომ მათ ეზოში არ გადავიდეს. ასეთ რაღაცას როგორ გავაკეთებთ, სულელები კი არ ვართ! პირიქით იმ გზაზე ისე დავდივართ, რომ მათი სახლისკენ არც კი ვიხედებით“, - გვითხრა ბრალდებულის ერთ-ერთმა დამ მაყვალა იაკობაძემ.

იაკობაძეების ადვოკატის რამინ პაპიძის განცხადებით, დაშავებულს ვერც ახალქალაქის და ვერც ახალციხის საავადმყოფოში იმ მიზეზით, რომ შესაბამისი კვალიფიკაციის ექიმი არ ჰყავდათ, ექსპერტიზა ვერ ჩაუტარდა: „უთქვამთ ნევრო- პათოლოგი არ გვყავსო. ატარეს წინ და უკან, თუმცა, იმ შედგენილი სამედიცინო დოკუმენტებით, რომლებიც დაშავებულის გასინჯვისას შეივსო, როგორც ვიცი სამმართველომ ექსპერტიზა დანიშნა და უკვე დასკვნაც არსებობს“.

ადვოკატის განმარტებით, დღეს იაკობაძეები ახალქალაქის რაიონულ სამმართველოში დაიკითხნენ.

შინაგან საქმეთა სამინისტროში აცხადებენ, რომ ახალქალაქის რაიონულმა სამმართველომ ძიება სსკ-ის 125 მუხლით დაიწყო, რაც ცემას გულისხმობს და ისჯება ჯარიმით, ან საზოგადოებისათვის სასარგებლო შრომით ვადით 120-დან 180-საათამდე, ანდა გამასწორებელი სამუშაოთი ვადით თხუთმეტ თვემდე.

[თამუნა უჩიძე, ახალციხე]