რას ითხოვენ გოგაშნელები

გოგაშნელებმა აქცია „სამხრეთის კარიბჭესთან“ მეორე დღეს, 12 დეკემბერსაც გამართეს, თუმცა, ვიდრე ხალხი შეიკრიბებოდა, გოგაშენში გარდაცვლილების ნათესავი, ილარიონ გოხაძე რედაქციაში შემოვიდა და ყვირილი დაიწყო: „რატომ არ წერთ ყველაფერს ისე როგორცაა?! დახურვა გინდათ?! ხოდა დაგხურავთ?! ახლა გამოდით და პასუხი გაეცით, მთელი სოფელია მოსული აქ!“



აქციაზე „სამხრეთის კარიბჭეს“ წარმომადგენლების გასვლის შემდეგ, გოგაშნელებმა განაცხადეს, რომ არავის არაფრით ემუქრებიან და ამჯერად მათზე განხორციელებული ზეწოლის შესახებ ინფორმაციის გაშუქება უნდათ.

„გუშინ ღამით, აქედან რომ წავედით, სახლში პოლიცია მოვიდა, 112-ზე ზარია შესული და თქვენ ბრალდებულის ოჯახის წევრები შეურაცხყოფის მიყენებაში გადანაშაულებენო. არადა გუშინ აქ ვიყავი აქციაზე. თვალით არავინ მინახავს, არც შეურაცხყოფა მიმიყენებია ვინმესთვის, დაანებონ ჩივილს თავი, გვაკმარონ რაც დაგვმართეს, თორემ რეგიონს დავაყენებთ ფეხზე!“ - აცხადებს გოხაძის მეუღლე ლალი მაისურაძე.



ფატმან ნათენაძის განცხადებით, გარდაცვლილის დამ მას შეურაცხყოფა არა ერთხელ მიაყენა: „გასვენებიდან მოვდიოდი, გზაზე დამხვდა და შემაფურთხა, თან დააყოლა, ჩემი ძმის საქმე უნდა გავაგრძელო და ყველა დაგხოცოთო. მეორედ ასე ახალციხის სასამართლოსთან მომექცა. ხელახლა გამოიძიონ ეს საქმე და ეს ხალხი გაგვაცალონ სოფლიდან თორემ იქ მკვლელობები გაგრძელდება“.

„მთელი სოფელი სისხლით მორწყეს, ორი ადამიანი, რვა თვის ბავშვი მოგვიკლეს და კიდევ არ ჩერდებიან!“ - აცხადებს თამრიკო ინასარიძე.
კითხვაზე, რას ითხოვენ „სამხრეთის კარიბჭესგან“ გვიპასუხეს: „აქციას იმიტომ ვმართავთ, რომ სიცრუე წერია „სამხრეთის კარიბჭეში“.

ასევე, კითხვაზე, თუ „სამხრეთის კარიბჭე“ მომხდარიდან დღემდე, ხუთი თვის განმავლობაში ცრუ ინფორმაციას აშუქებდა, აქამდე პროტესტი რატომ არ გამოხატეს, გვიპასუხეს: „ბოლო სტატია იყო ბოლო წვეთი. (ბრალდებულის და: „სამხარეოს უფროსმა წიხლები მირტყა, ტანსაცმელი შემომაგლიჯა და გაუპატიურებით დამემუქრა“ სკ). ამოვიდა ყელში ცილისწამება და ტყუილი“.

მათი განცხადებით, „სამხრეთის კარიბჭეს“ ბრალდებულის დასა და მისი მცირე წლოვანი შვილების სამხარეო-სამმართველოში ცემის შესახებ არ უნდა დაეწერა, ეს არ არის მართალი და იმიტომ: „პოლიცია სოფელში იცავს მათ, ეგენი რომ არ ყოფილიყვნენ, იქ უარესი მოხდებოდა, ალბათ დავხოცავდით ერთმანეთს. ეს პოლიციელები ასეთ რაღაცას არ იზამდნენ. ან, იმ 15-16 წლის გოგოს, რომ ამბობს გაუპატიურებით მემუქრებოდნენო, არ რცხვენია?!“

გარდაცვლილის ახლობლების თქმით, პოლიცია მათ უფრო ჩაგრავს და გვერდით სწორედ ბრალდებულის დების ოჯახებს უდგას.

„ერთი სიტყვის გულისთვის ერთი „სუტკა“ ჩამსვეს, ეგენი გამოვიდნენ შეურაცხყოფა მომაყენეს და მოწმედ ისევ თავისი ხალხი დაიყენეს, ამიტომ ბოლოს ყველაფერი მე დამბრალდა“, - გვითხრა შოთა ნათენაძემ.

ილარიონ გოხაძის განცხადებით, მათ ბრალდებულის დები და მათი ოჯახის წევრები პროვოკაციაზე აგებენ: „ერთხელ დამაკავეს კიდეც მაგათ გამო. ხმა ვეღარ ამომიღია ოჯახში. აღარ შეიძლება მეტის მოთმენა. თუ არ გაასახლებენ მაგათ სოფლიდან მთელ ახალქალაქის რაიონს ფეხზე დავაყენებთ“.

გოგაშნელები ბრალდებულისთვის უმაღლესი სასჯელის ზომას ითხოვენ: „სამხრეთის კარიბჭეში“ ეწერა შეურაცხადია და შეიძლება გამოუშვანო. ეგ შეურაცხადი არ არის, მე ვასწავლიდი სკოლაში 1997-1998 წლებში, მეურნეობა ჰქონდა, ყიდდა ბაზარზე რაღაცეებს და ფულსაც იღებდა. ასე შეურაცხადები არ იქცევიან“.

აქცია „სამხრეთის კარიბჭეს“ რედაქციასთან დაახლოებით ერთ საათს გაგრძელდა.

შეგახსენებთ, რომ საპროტესტო აქცია რედაქციასთან გოგაშნელებმა 11 დეკემბერს, ღამითაც გამართეს. მათ "სამხრეთის კარიბჭეში" გამოქვეყნებული სტატია, გააპროტესტეს, რომელიც სამცხე-ჯავახეთის სამხარეო მთავარი სამმართველოს უფროსის თეიმურაზ კალანდაძის ცემასა და გაუპატიურების მუქარაში დადანაშაულებას ეხება. გოგაშნელებმა რედაქცია ცრუ ინფორმაციის გავრცელებაში დაადანაშაულეს.



[sknews.ge]