რაბათში მცხოვრები კაპანაძეები სახლის ფასადის შეცვლისთვის აღარ დაჯარიმდებიან

რეაბილიტირებული რაბათის უბანში, 108–2 ნომერში მცხოვრებმა ეკატერინე კაპანაძემ, თვითნებურად შეცვლილი ფასადი ისევ შეცვალა.
კაპანაძე სახლის პირველ სართულზე კომერციული ობიექტის გახსნას გეგმავდა და ამიტომ, ფანჯრის ადგილას კარი გაჭრა. მას შემდეგ, რაც ახალციხის მერიისგან გამაფრთხილებელი წერილი მიიღო, შენობას კარი მოხსნა და ისევ ფანჯარა ჩააშენა. თუ შენობას პირვანდელ სახეს არ დაუბრუნებდა, მას ჯარიმის 5.000 ლარის გადახდა მოუწევდა.

ახალციხის მერიაში კი განმარტავენ, კაპანაძეები ჯარიმის აღარ გადაიხდიან.

რაც შეეხება მეორე ოჯახს, შავაძეებს, რომლებმაც შენობის ფასადი ასევე თვითნებურად შეცვალეს, მერიიდან გამაფრთხილებელი წერილი მათ 1 ოქტომბერს გაუგზავნეს.

ციალა შავაძე რაბათის შესასვლელში, ციხისძირის ქუჩაზე ცხოვრობს. როგორც მან „სამხრეთის კარიბჭესთან“ განაცხადა მიშენებული კიბეების მონგრევა დღეს, 10 ოქტომბერს დაიწყო და უახლოეს მომავალში სახლის კედელს პირვანდელ მდგომარეობას დაუბრუნებს.

„მეუღლე მყავდა ცუდად და აქამდე ვერ შევძელი. ამ ადგილზე ისევ ფანჯარას გავაკეთებ“, – ამბობს ციალა შავაძე.

თუმცა მანამდე შავაძეები აცხადებდნენ, რომ სახლს მხოლოდ ორი რიგი აგური მოაცალეს და ამიტომ არაფრის შეცვლას არ აპირებდნენ. მოგვიანებით კი, მერიის გამაფრთხილებელი წერილის მიღების შემდეგ, ფასადისთვის პირველადი სახის დაბრუნებაზე დათანხმდნენ.

[თინათინ ზაზაძე, ახალციხე]