აგარის ბაღში ძველი და ახალი თანამშრომლები ერთმანეთს დაუპირისპირდნენ

აგარის ბაღში დაძაბულობა ახალი თანამშრომლის ეთერ გულიაშვილის გამოჩენამ გამოიწვია. ბაღის თანამშრომლებმა მას ჰკითხეს, რატომ დაწერა განცხადება ბაღში დასაქმებაზე, როცა იცოდა, რომ ადგილები არ იყო: „რა ნამუსით უნდა შემოგვხედო, გამოდის, რომ შენ ჩვენ გვიჩივლე“.

გულიაშვილი აცხადებს, რომ არანაირი საჩივარი მას არ დაუწერია. დაწერილი ჰქონდა განცხადება დასაქმებაზე და ამის საფუძველზე აიყვანეს სამსახურში: „თუ სადმე ნახავთ საჩივარს ჩემი ხელმოწერით, ეს სიტყვები მერე მითხარით“.

ბაღის ძველი თანამშრომლები აცხადებენ, რომ თუ პერსონალს დაუსაქმებლობის მიხედვით არჩევენ, მათ ოჯახებში, მათ გარდა ყველა დაუსაქმებელია. არგუმენტი არც კვალიფიკაციის არქონაა, ვინაიდან, ყველა მათგანს გააჩნია შესაბამისი განათლება: „უდიპლომო აქ არცერთი ვართ. თუ ახალი თანამშრომლების მიღება უნდათ, გახსნან ახალი, მესამე ჯგუფი“.

ბაღის პერსონალი ხელმძღვანელთან შეხვედრას ითხოვს.

„მოვიდეს და გაგვცეს ყველა კითხვაზე პასუხი. ახალი თანამშრომლები მაშინ რატომ არ მიიღეს, როცა ერთი წლის განმავლობაში, უხელფასოდ ენთუზიაზმზე ვმუშაობდით? მაშინ დაეწერა გულიაშვილს განცხადება“, – აცხადებენ პედაგოგები.

აგარის ბაღი სახელმწიფო მიმდინარე წლის ივნისში გახდა. მანამდე, ერთი წლის განმავლობაში, კერძო იყო და აქ პერსონალი ანაზღაურების გარეშე მუშაობდა. ივნისში ბაღი მაშინდელმა საკრებულოს თავმჯდომარემ ოლეგ სანდროშვილმა და მაშინდელი სკოლამდელი აღზრდის დაწესებულებათა გაერთიანების ხელმძღვანელმა ნანა გელაშვილმა გახსნეს.

აგარის ბაღში ამ ეტაპზე 43 აღსაზრდელია. ბაღი ხუთ სოფელს ემსახურება.

შეგახსენებთ, დილიდან აგარის ბაღში დაძაბულობაა. თანამშრომლები კოლეგების გათავისუფლებას და მათ ადგილზე ახალი პედაგოგების დანიშვნას აპროტესტებენ.

[Sknews.ge]