ახალციხის ციხის რეაბილიტაციისას დაღუპული მამაკაცი მამუკა ბლუაშვილია

უბედური შემთხვევა გუშინ საღამოს, დაახლოებით 19:00 საათზე მოხდა. მამუკა ბლუაშვილი ციტადელიდან გადმოვარდა და ადგილზევე დაიღუპა.

ახალციხის სასწრაფო სამედიცინო დახმარების სამსახურში შემთხვევის შესახებ შეტყობინება 19 საათსა და 28 წუთზე შევიდა.

- ”პოლიციიდანაც რეკვადნენ, რაბათიდანაც, ათობით ზარი შემოვიდა. ადგილზე ორი ბრიგადა გავიდა, სასწრაფო დახმარებისა და კატასტროფის”, - ამბობს ახალციხის სასწრაფო სამედიცინო დახმარების სამსახურის მორიგე ოპერატორი ენრიკო კაპანაძე.

სასწრაფო დახმარების ბრიგადის ექიმის ჯულიეტა კაპანაძის თქმით, ადგილზე მისულ სასწრაფო დახმარების ჯგუფს საშუალო ასაკის მამაკაცი გარდაცვლილი დახვდა.

მომხდარის შესახებ ბლუაშვილის ახლობლებს ციტადელზე მომუშავე მუშებმა შეატყობინეს.

- ”რა და როგორ მოხდა არ ვიცით, ციხის წარმომადგენლობიდან აქ არავინაა. ვიღაც ხომ უნდა იყოს, რომ პასუხი გაგვცეს. ვის ვკითხოთ, მუშებს?!” - გვითხრა გარდაცვლილის მეუღლის ბიძამ ზაზა პაქსაშვილმა გუშინ საღამოს, იმ დროს, როდესაც გარდაცვლილს ექსპერტიზა უტარდებოდა.

ახალციხის მუნიციპალიტეტის სოფელ კლდეში მცხოვრებმა მამუკა ბლუაშვილმა რაბათის ციხის სამშენებლო სამუშაოებზე მუშაობა ორი თვის წინ დაიწყო.

- ”ყურსასმენი აპარატი ჰქონდა, თორემ ფიზიკურად მუშაობა არ უჭირდა. ვერ ვხვდებით რა შეიძლება მომხდარიყო”, - ამბობს ბლუაშვილის ახლობელი დათო კახიშვილი.

მომხდარის შესახებ დეტალების გარკვევა ”სამხრეთის კარიბჭემ” რაბათის ციხის დირექტორთან ნოდარ გოროხოვთან სცადა.

- ”ვერ გეტყვით რა მოხდა, ასობით სამშენებლო კომპანია მუშაობს, მათ მუშაობაში მე არ ვერევი”, - განაცხადა გოროხოვმა.

მამუკა ბლუაშვილი სოფელ კლდეში გუშინ ღამით, დაახლოებით 24:00 საათზე გადაასვენეს. მომხდარის შესახებ გვიანობამდე არაფერი იცოდნენ ბლუაშვილის მშობლებმა, რომლებიც ქალაქ რუსთავში ცხოვრობენ. ექსპერტიზის პასუხები ცნობილი ერთ კვირაში გახდება.

მომხდარს სამცხე-ჯავახეთის სამხარეო მთავარი სამმართველო იძიებს. რაბათის ციხის ხელმძღვანელობა გუშინ საღამოსვე დაკითხეს.

კულტურული მემკვიდრეობის ძეგლად გამოცხადებული რაბათის უბნის სარეკონსტრუქციო-სარესტავრაციო სამუშაოები გასული წლის მაისში დაიწყო. მშენებლობის პირველი ეტაპი აგვისტოში სრულდება. აგვისტოს შუა რიცხვებისთვისაა დაგეგმილი რაბათის უბნის ოფიციალური გახსნა. მშენებლობა, რომელიც დაახლოებით 7 ჰექტარ ფართობს მოიცავს, ცენტრალური ბიუჯეტიდან ფინანსდება.

[ნინო ნარიმანიშვილი, ახალციხე]