”მემარჯვენეების” მაჟორიტარი დეპუტატობის კანდიდატები მესხეთში

.

პარტია ”ახალი მემარჯვენეების” ლიდერმა დავით გამყრელიძემ რამდენიმე წუთის წინ, ”ახალი მემარჯვენეების” ახალციხის რაიონულ ოფისში ახალციხის, ბორჯომისა და ასპინძის მაჟორიტარი დეპუტატობის კანდიდატები დაასახელა.

ახალციხეში მაჟორიტარი დეპუტატობისთვის მალხაზ გოგოლაძე, ბორჯომში - რომანოზ ახვლედიანი, ასპინძაში კი გია ჭელიშვილი იბრძოლებს.

”მემარჯვენეების” სამივე კანდიდატი ადგილობრივია.

”სამცხე-ჯავახეთი ერთ-ერთი რთული რეგიონია საარჩევნოდ, აქ ”ნაციონალური მოძრაობა” ყოველთვის ცდილობდა მეტად ეკონტროლებინა სიტუაცია და 90-პროცენტიანი შედეგიც მიეღო, - ამბობს გამყრელიძე და ამატებს, რომ სწორედ ამიტომ სამივე მუნიციპალიტეტში ადგილობრივი კადრი შეირჩა - ხშირია შემთხვევა, როდესაც შენი გაცხადებული და შეთავაზებული კანდიდატურა იხსნება ვიღაცის ზეწოლის გამო. ჩვენი მაჟორიტარი დეპუტატობის კანდიდატები განსაკუთრებული ერთგულებით გამოირჩევიან”.

გია ჭელიშვილი პარტიის ერთ-ერთი დამფუძნებელია და ათი წელია ასპინძაში ”მემარჯვენეებს” წარმოადგენს. რომანოზ ახვლედიანი ორი წელია რაც პოლიტიკაში ჩაერთო. როგორც თავად ამბობს, არ აპირებდა, მაგრამ ეს ქვეყანაში შექმნილმა, უმძიმესმა სიტუაციამ აიძულა. რაც შეეხება მალხაზ გოგოლაძეს, ის ”ახალ მემარჯვენეებში” რვა თვეა რაც გაწევრიანდა. გოგოლაძე ახალცხის რაიონული ორგანიზაციის თავმჯდომარე იყო.

”მემარჯვენეებს” მაჟორიტარი დეპუტატობის კანდიდატი ადიგენსა და ჯავახეთში არ დაუსახელებიათ.

”დღეს ჩვენ შეგნებულად არ დავასახელეთ ჯავახეთის კანდიდატურები. მიუხედავად იმისა, რომ გარკვეული მოსაზრებები აქ კანდიდატების შესახებ პარტიაში უკვე არსებობს. მიუხედავად განსაკუთრებული სირთულისა, ჯავახეთში ჩვენი პარტია მუშაობს და იქ პრეზენტაციას ცალკე გავმართავთ”, - აცხადებს გამყრელიძე.

კანდიდატების წარდგენის შემდეგ ”ახალმა მემარჯვენეებმა” ახალციხის ქუჩებში აქცია - ”არა მონოპოლიას”გამართეს.

[თამუნა უჩიძე, ახალციხე]