ირაკლი ღარიბაშვილი სამცხე-ჯავახეთს სტუმრობს

ახალქალაქის მუნიციპალიტეტის სოფელ კარწახში საბაჟო-გამშვები პუნქტის მშენებლობა რამდენიმე თვეში დასრულდება. პროექტის ღირებულება დაახლოებით 10 მილიონი ლარია. მშენებლობაზე 100-მდე მოქალაქე მუშაობს, საბაჟო-გამშვები პუნქტის ექსპლუატაციაში შესვლის შემდეგ კი 70 ადამიანი, უმეტესად კი ადგილობრივები დასაქმდებიან.

საბაჟო-გამშვები პუნქტის მშენებლობის ვადებსა და ტექნიკურ დეტალებზე საქართველოს პრემიერ-მინისტრს ინფორმაცია ფინანსთა მინისტრმა ნოდარ ხადურმა და რეგიონის გუბერნატორმა აკაკი მაჭუტაძემ მიაწოდეს.

ირაკლი ღარიბაშვილის განცხადებით, კარწახის გამშვები პუნქტი საქართველოს თურქეთთან ახალი, ეფექტური დერეფნით დააკავშირებს, შემოკლდება მანძილი არდაგანამდე, გაუმჯობესდება სასაზღვრო პოლიტიკა, რეგიონს და ადგილობრივებს კი შემოსავლის ახალი წყარო გაუჩნდებათ.

ახალ საბაჟო-გამშვებ პუნტქტში სწრაფი და კომფორტული მომსახურებისთვის ყველა პირობა შეიქმნება. შეზღუდული შესაძლებლობების მქონე პირებისთვის კი საჭირო ინფრასტრუქტურის მოწყობა იგეგმება.





[sknews.ge]