„ქართულმა ოცნებამ“ ასპინძაში კანდიდატები წარადგინა

ამომრჩევლებთან შეხვედრა ასპინძის კულტურის ცენტრში შედგა. ცაბაძე ადგილობრივებს „ქართული ოცნების“ წევრმა, ბორჯომის მაჟორიტარმა დეპუტატმა გედევან ფოფხაძემ წარუდგინა.

„რთული და პრინციპული პროცესი მიდის კანდიდატების შერჩევის. საბოლოო ჯამში ხერხდება და ხდება ისეთი კანდიდატების შერჩევა, რომლებიც საუკეთესოები არიან კონკრეტულ რაიონებში. „ქართულ ოცნებას“ აქვს ამის ფუფუნება – შეარჩიოს საუკეთესო კანდიდატები და წარუდგინოს ქართულ საზოგადოებას. ასეთი ღირსეული კანდიდატია ლევან ცაბაძე“, - განაცხადა გედევან ფოფხაძემ.

ლევან ცაბაძემ, რომელიც ასპინძის გამგებლად 2013 წლის 16 მაისს აირჩიეს, ამომრჩევლებს ერთწლიანი მუშაობის შედეგები გააცნო და სამომავლო გეგმებზე ესაუბრა.

„ველოდები, რომ გავიმარჯვებ. ვპირდები მოსახლეობას, რომ ვიმუშავებთ იმ მტკივნეულ საკითხებზე, რაც მათ აწუხებთ. ერთერთი უმუშევრობის თემაა, ჩვენ ავირჩიეთ სტრატეგია, ავამუშაოთ ისეთი საწარმოები, რაც დასაქმების პრობლემას მოხსნის“, – აღნიშნა ცაბაძემ.
ამომრჩევლებს ლევან ცაბაძის მხარდაჭერისკენ მოუწოდეს პარლამენტის წევრმა თემურ ჭკუასელმა და სამცხე–ჯავახეთის გუბერნატორმა აკაკი მაჭუტაძემ.

ჭკუასელმა აღნიშნა, რომ „ქართული ოცნება“ პირველი პოლიტიკური ძალაა, ვინც რეალური თვითმმართველობის დანერგვას აპირებს: „ყველა მოდიოდა დემოკრატიის დროშით, მაგრამ მხოლოდ ქართულმა ოცნებამ გაბედა რეალური თვითმმართველობა დააწესოს ქვეყანაში. ამას სწორედ ისეთი თავდადებული და თავის რაიონზე შეყვარებული ადამიანები სჭირდება, როგორიც ლევან ცაბაძეა“.

ლევან ცაბაძესთან 29–წლიან მეგობრობაზე ისაუბრა სამცხე-ჯავახეთის მხარის რწმუნებულმა აკაკი მაჭუტაძემ.

„ჩვენი მეგობრობა დაიწყო იმ ლამაზი სპორტიდან, რასაც რაგბი ჰქვია. ეს არის ადამიანი, რომელიც სამშობლოზე უზომოდაა შეყვარებული. მეგობრობისთვის, საქართველოს სიყვარულისთვის არის თავდადებული. იცის შრომის ფასი, ამ შრომის შედეგად მიაღწია სპორტულ ცხოვრებაში წარმატებებს და იგივე თავდადებით გააკეთებს იმას, რასაც ქვეყნისთვის სიკეთე ჰქვია. ჩემი თხოვნაა მხარი დაუჭიროთ ლევან ცაბაძეს, იგივე, ჩემს და თქვენს ლეონსიოს“, - მიმართა შეკრებილებს აკაკი მაჭუტაძემ.

შეხვედრის ბოლოს ლევან ცაბაძემ მაჟორიტარობის კანდიდატები დაასახელა. დაბა ასპინძაში მაჟორიტარი დეპუტატობის კანდიდატი დავით ფართლაძეა, აწყვიტის თემში - ავთანდილ ივანიძე, დამალის თემში - ემილ ბალოიანი, ვარგავის თემში -ილია თედორაძე, იდუმალაში - ოთარ კობერიძე, ნაქალაქევში - ტიტიკო მაღრაძე, ოთაში – ბესიკ მაგრაქველიძე, ოშორაში - ბაადურ სეთურიძე, რუსთავში - ბესიკ ბერიძე, ტოლოშში - გურამ მელიქიძე, ძველში - გიორგი ჯვარიძე, ხიზაბავრის თემში კი თემურ პლაჭიაშვილი;

შეკრებილები აცხადებდნენ, რომ „ქართულმა ოცნებამ“ კანდიდატებად ისეთი პიროვნებები შეარჩია, რომელთა ნდობაც შეიძლება.

„პატიოსანი და სუფთა რეპუტაციის ადამიანები არიან, მონდომებითა და საქმისადმი ერთგულებით გამოირჩევიან. კარგად ესმით ჩვენი რაიონის პრობლემები და თავს არ დაზოგავენ მათ მოსაგვარებლად“, - განაცხადა ადგილობრივმა მედეა წინწკალაძემ. (R)

ამავე თემაზე იხილეთ ვიდეომასალა.

[sknews.ge]