ორი წლიანი ჩავარდნის შემდეგ, ‘მტკვარიჰესის’ მშენებლობა განახლდება

სამხრეთ საქართველოში, ახალციხის მუნიციპალიტეტში, მდინარე მტკვარზე მშენებარე, „მტკვარიჰესის“ მშენებლობას „თანაინვესტირების“ ფონდი გააგრძელებს. ფონდში აცხადებენ, რომ პროექტის განხორციელებით ენერგეტიკის სფეროში 100 მლნ ამერიკული დოლარის ინვესტიცია ჩაიდება.

საქართველოს ენერგეტიკის სამინისტროს საზოგადოებასთან ურთიერთობის სამსახურის ინფორმაციით, პროექტთან დაკავშირებით „მტკვარიჰესის“ ინვესტორ კომპანიასა და “თანაინვესტირების ფონდს“ შორის მოლაპარაკებები უკვე მიმდინარეობს.

„ენერგეტიკის სამინისტრო გაუწევს მონიტორინგს, რომ პროექტის გაყიდვის შემთხვევაში, ახალმა კომპანიამ ინვესტორის მიერ 2009 წელს სახელმწიფოს წინაშე აღებული ყველა ვალდებულება შეუცვლელად გადაიფორმოს“, - ნათქვამია წერილში, რომელიც „სამხრეთის კარიბჭემ“ საქართველოს ენრგეტიკის სამინისტროდან მიიღო.

„მტკვარიჰესის“ გენერალური დირექტორი ბიძინა ბეჟუაშვილი ამბობს, რომ ინვენსტორთან ხელშეკრულება ჯერ არ გაფორმებულა: „თანაინვესტირების ფონდი“ აღნიშნული პროექტით ძალიან არის დაინტერესებული. ამ ეტაპზე მათთან მოლაპარაკება მიმდინარეობს, საბოლოო გადაწყვეტილება ჯერ არ მიგვიღია, ვფიქრობთ, რომ ახლო მომავალში ყველაფერი მოგვარდება“.

მისი თქმით „მტკვარიჰესის“ პროექტში ძირეული ცვლილებები არ განხორციელდება, თუმცა შესაძლებელია მცირე კორექტივები შევიდეს: „მაგალითად, გაიზარდოს ჰესის სიმძლავრე“.

როდის გაგრძელდება ორი წლის წინ შეჩერებული მშენებლობა, ბეჟუაშვილი ვერ აკონკრეტებს.

„მარტო ჩემზე არ არის დამოკიდებული, თუმცა სამი თვე საკმარისია იმისთვის, რომ იურიდიულ დოკუმენტებს ხელი მოეწეროს“,- ამბობს იგი.

„მტკვარიჰესის“ მშენებლობა 2009 წლის ნოემბერში დაიწყო და 2014 წელს უნდა დასრულებულიყო. თუმცა, ჰესიდან ინვესტორები გავიდნენ და 2012 წლის პირველ აპრილს სამეთვალყურეო საბჭოს გადაწყვეტილებით მშენებლობა შეჩერდა. ჰესზე მოსამზადებელი სამუშაოები თითქმის დასრულებულია, მშენებლობაზე 20 მილიონ დოლარზე მეტი უკვე დაიხარჯა.

შეგახსენებთ, სამცხე-ჯავახეთში მშენებარე ჰესების შესახებ, ერთი წლის წინ, 2013 წლის 14 მარტს, ყოფილმა პრემიერ-მინისტრმა ბიძინა ივანიშვილმა განაცხადა, რომ ეს საკითხები უნდა შეესწავლათ: „ძალიან მკაცრი მინისტრი გვაყავს გარემოს დაცვის და ძალიან აქტიურობს. ბუნება უნდა შევუნახოთ შვილებს. შეიძლება დროებით ჩვენ მივიღოთ რაღაც სარგებელი და მომავალში მივიღოთ უარესი. ორი მხარეა, ორივე მხარეს ვაძლევ მე თავისუფლებას. ხათუნა როცა გამოდის, გაჩერება უნდა ყველაფრის, მეორე მხრიდან კალაძე ბობოქრობს, რომ ენერგია გვჭირდება. მთავრობაში ხშირად ხდება ასე, ნორმალურია ორივე მინისტრს უნდა ჰქონდეს საშუალება დაიცვას თავისი სამინისტრო”.

მოგვიანებით, 2013 წლის 12 დეკემბერს, საქართველოს ენერგეტიკის მინისტრმა კახა კალაძემ განაცხადა, რომ ჰესის მშენებლობა გაზაფხულზე გაგრძელდებოდა: „როგორც ვიცი, „მტკვარიჰესს“ დაფინანსების პრობლემა ჰქონდა და ინვესტორებს ეძებდნენ. სწორედ ამის გამო შეჩერდა მშენებლობა. მათ ვადების გადაწევა მოითხოვეს, ჩვენ მაქსიმალურად დავეხმარეთ. ჩემი ინფორმაციით ინვესტორი უკვე ნახეს და სამუშაოებსაც მალე განაახლებენ“.

პირვანდელი პროექტის მიხედვით, ჰესის სიმძლავრე 48 მგვ უნდა ყოფილიყო. თუმცა, კორექტირების შედეგად ჰესის დადგმული სიმძლავრე 53, 3 მგვ იქნება. ელექტროენერგიის წლიური გამომუშავება კი 255,2 გეგავატი. სთ.

[მანანა სარაშვილი, ახალციხე]