ბაგა-ბაღში აყრილი პარკეტი დავის საგანი გახდა

მილი, რის გამოც ბაგა-ბაღის საძინებელში პარკეტი აიყარა, შეკეთებულია. ბაგა-ბაღის მენეჯერი ციცო საანიშვილი ამბობს, რომ ავარია ინდ.მეწარმე „ქრისტინე სარაშვილმა“ აღმოფხვრა: „ვიყიდეთ ჩვენი სახსრებით მილის პატარა მონაკვეთი და გაგვიკეთა“.

თუმცა, აღნიშნული კომპანია ამ დაზიანებაზე პასუხისმგებელი არ იყო. იმ სამზარეულოს სველი წერტილები, სადაც 2 მარტს მილი გასკდა, გასული, 2103 წლის იანვარში, შპს „გვრიტმა“ გაარემონტა. სამუშაოებისთვის ჯამში 27.641 ლარი დაიხარჯა.

„შპს „გვრიტის“ წარმომადგენელი გელა ჭალიძე ამბობს, რომ ამ დაზიანების შესახებ მათ არც კი გაუგიათ: „პირველად თქვენგან მესმის. საგარანტიო ვადები უკვე გასულია. ვადის გასვლამდე რაც დაზიანებულა, ყოველთვის გაგვიკეთებია“.

„შპს „გვრიტისგან“ განსხვავებით, ბაგა-ბაღში შესრულებული სამუშაოებისთვის საგარანტიო ვადები ჯერ გასული არ აქვს „ქრისტინე სარაშვილს“. აღნიშნულმა კომპანიამ ბაგა-ბაღის რემონტი 2013 წლის ზაფხულში დაიწყო და 2014-ის დასაწყისში დაასრულა. „ქრისტინე სარაშვილის“ მიერ გაკეთებული საძინებელი დატბორა „გვრიტის“ გაკეთებულმა წყლის მილმა. ვინიდან „სარაშვილს“ საგარანტიო გასული არ აქვს, მას სთხოვენ საძინებლის დაზიანებული იატაკის გამოცვლას.

სკოლამდელი აღზრდის დაწერებულებათა გაერთიანების ხელმძღვანელი ნანა გელაშვილი ამბობს, რომ სხვა გამოსავალი არ აქვთ, რადგან გაერთიანებას სახსრები არ აქვს: „როცა ფასიანი იყო საბავშვო ბაღები, ჩვენი შემოსავალი გვქონდ, შემეძლო, ბიუჯეტიდან სახსრები გამოგვეყო და გაერთიანებას გაეკეთებინა. მაგრამ, რადგან უფასოა, მთლიანად ვზივარ მოჭრილ ბიუჯეტზე. არანაირი საშუალება არ მაქვს, რომ ბაღებს დავეხმარო, თუ გამგეობა არ დამეხმარა. ამ შემთხვევაში ვთხოვთ ინდ. მეწარმე „ქრისტინე სარაშვილს“ და იმედია დაგვეხმარება“.

„ქრისტინე სარაშვილის“ ხელმძღვანელი ნუგზარ სარაშვილი ამბობს, რომ ოთახს ხელახლა გააკეთებს, თუმცა, არა იმის გამო, რომ ეს მისი პასუხისმგებლობაა. თუმცა, ასე იმ შემთხვევაში მოიქცევა, თუ გამგეობა მასზე ზეწოლას შეწყვეტს.

„როგორ მივატოვო ბაღი ასეთ მდგომარეობაში? ჩემი მოქალაქეობრივი ვალია და გავარემონტებ, მაგრამ აქ სხვანაირი ვაჭრობა დამიწყეს. ამბობენ, რომ თითქოს ჩემი ბრალია მილის დაზიანება. მთელი ფინასები მათთან [ახალციხის გამგეობა] იმყოფება და გააჩერეს გადმორიცხვები. ეს არ არის ლამაზი, თუ ასე იქცევიან, თან მავალდებულებენ, მაშინ შეიძლება სასამართლოს მივმართო. ვიმეორებ, გავაკეთებ, მაგრამ თუ სამაგიეროდ თანხას დამიქვითავენ და რაღაც-რაღაცეებს მიედ-მოედებიან, აღარ გავაკეთებ“, - აცხადებს ნუგზარ სარაშვილი.

მისივე თქმით, მისი წარმომადგენელი დღეს მთელი დღის განმავლობაში ცდილობდა თვითმმართველობაში ვითარების გარკვევას, თუმცა ვერ შეძლო: „უთხრეს, რომ საკრებულოს თავმჯდომარე არ არის ადგილზე და მის გარდა ამ საკითხს ვერავინ გადაწყვეტს. ალბათ მომიწევს მე ჩამოვიდე თბილისიდან. ჯანმრთელობის პრობლემების გამო ვარ აქ, ჩამოვალ ამ დღეებში და გავარკვევ“.

რატომ შეუჩერა გადარიცხვები გამგეობამ „ქრისტინე სარაშვილს“ ამის გარკვევა „სამხრეთის კარიბჭემ“ თვითმმართველობაში სცადა. თუმცა, არც საკრებულოს თავმჯდომარემ და არც გამგებელმა ჩვენს სატელეფონო ზარებს არ უპასუხეს. ამ საკითხის გარკვევა "სამხრეთის კარიბჭეს" გამგეობის საზოგადოებასთან ურთიერთობის სამსახურში აღარ უცდია, რადგან აღნიშნულ სამსახურში მთელი დღის განმავლობაში გვარწმუნებდნენ, რომ მილი შპს "გვრიტმა" შეაკეთა, მაშინ როცა შპს "გვრიტმა" დაზიანების შესახებ არც კი იცოდა.

შეგახსენებთ, რომ ახალგარემონტებულ პირველ საბავშვო-ბაღში წყლის მილი შაბათს, 2 მარტს გასკდა და საძინებელი ოთახი დატბორა. ითახში აყრილია ლამინირებული პარკეტი. ადმინისტრაციამ აღსაზრდელები დროებით სხვა ოთახში გაიყვანა.



[თინათინ ზაზაძე, ახალციხე]