საფეხბურთო კლუბი ”მესხეთი” ისევ დაიშალა

ერთწლიანი პაუზის შემდეგ ”მესხეთი” გასულ წელს, ახალციხელი ბიზნესმენის ნიკა სარჯველაძის ფინანსური მხარდაჭერით აღდგა. ნიკას მამა, ასევე ბიზნესმენი ნუგზარ საჯველაძე გუნდს გასულ წლებშიც აფინანსებდა. ახლა ”მესხეთს” ეს დაფინანსებაც შეუწყდა.

-”სარჯველაძე გუნდს ისევ დააფინანსებს, თუ ადგილობრივი თვითმმართველობიდან თანადაფინანსება იქნება”,- ამბობს საფეხბურთო კლუბ ”მესხეთის” მეკარე გელა ძამუნაშვილი.

ფეხბურთელები ახალციხის მუნიციპალიტეტის გამგებელს, გელა დემატრაძეს გუშინ შეხვდნენ და გუნდის დაფინანსება სთხოვეს, თუმცა, მათ დემეტრაძისგან დაპირება ვერ მიიღეს.

-”თხოვნით თანადაფინანსების შესახებ ადგილობრივ თვითმმართველობას წერილობითაც მივმართეთ. პასუხს 10 ივლისისთვის მივიღებთ. მართალია, გამგებელმა დაფინანსებაზე უარი უკვე გვითხრა, მაგრამ იმედს მაინც არ ვკარგავთ, რომ გარკვეულ დახმარებას მივიღებთ”, - ამბობს ძამუნაშვილი.

მიუხედავად იმისა, რომ გუნდი დაიშალა რამდენიმე ფეხბურთელი ახალციხის ცენტრალურ სტადიონზე მაინც ყოველდღე დადის და ვარჯიშობს.

-”თითქმის 10 წელია რაც ”მესხეთის” გუნდში ვთამაშობ, ძალიან გაგვიჭირდება თუ გუნდი დაიშლება, ჩვენი ერთადრეთი საქმე და შესაბამისად შემოსავლის წყაროც ფეხბურთია”, - ამბობს ფეხბურთელი გრიშა გეორქიანი.

გასულ წელს ”მესხეთი” წარმატებულად ასპარეზობდა. გუნდს სამწლიანი გეგმაც ჰქონდა შემუშავებული. ”მესხეთი” პირველ ლიგაში ლიდერებს შორის ადგილის შენარჩუნებისთვის იბრძოდა და უმაღლეს ლიგაში გადასასვლელად ემზადებოდა, ასევე დაგეგმილი იყო ბავშვთა ფეხბურთის განვითარებაც.

[მანანა სარაშვილი, ახალციხე]