'ვისოლ ჯგუფი' ახალციხეში სასტუმრო 'ლომსიას' კეტავს

„ლომსიას“ დაკეტვით, 2014 წლის 1-ლი მარტიდან, სამსახურის გარეშე 60-მდე ადგილობრივი დარჩება.

„დახურვის შესახებ გადაწყვეტლება მიღებულია. ოფიციალურ ინფორმაციას მოგვიანებით მოგაწვდით“, - განმარტავენ სასტუმრო „ლომსიას“ ადმინისტრაციაში.

სასტუმროს მუშაობის შეწყვეტის შესახებ ინფორმაცია დღეს, 24 თებერვალს, სასტუმროს ადმინისტრაციამ ფეისბუქის ოფიციალური გვერდით გაავრცელა. განცხადებაში ნათქვამია, რომ 28 თებერვალს სასტუმრო დაიკეტება. "ლომსიას" გუნდი მადლობას უხდის ყველა მოქალაქეს, ვისაც მათთან რაიმე ტიპის შეხება ჰქონდა.

სასტუმრო "ლომსია", რომელიც ერთ-ერთი ყველაზე მაღალი კლასის სასტუმროა ახალციხეში, "ვისოლ ჯგუფმა" 2012 წლის 9 აგვისტოს გახსნა. გახსნის ცერემონიას საქართველოს მაშინდელი პრეზიდენტი მიხეილ სააკაშვილი ესწრებოდა.

ქალაქის ცენტრში მდებარე 63- ნომრიანი სასტუმრო 150 სტუმარზეა გათვლილი. ერთადგილიანი, ორადგილიანი, ლუქს ოთახებისა და აპარტამენტების გარდა, “ლომსია“ რამდენიმე რესტორანსაც მოიცავს. სასტუმროს აქვს შიდა ბარი და ტერასაც.

სამვარსკვლავიან სასტუმროში ერთადგილიანი ნომერი 150 ლარი ღირს, ორ ადგილიანი - 256 ლარი, მცირე ზომის ლუქსი, საუზმე 2 პიროვნებაზე - 292 ლარი, ლუქსი - 334 ლარი, აპარტამენტი (+ დეპოზიტი 300 ლარი) - 505 ლარი. ორ ადგილიანი ნომერი 1 სტუმრისთვის - 185 ლარი.

სასტუმროს მშენებლობა 2011 წლის მაისში დაიწყო და 2012 წლის აგვისტოში დასრულდა. „ლომსიას“ პროექტზე გერმანელი არქიტექტორი მანფრედ რონშტედტი და ქართველი არქიტექტორი თენგიზ კვანტალიანი მუშაობდნენ. სასტუმროს მენეჯერად კი ვისოლ ჯგუფმა ფრანგი სპეციალისტი ჟან პიერ რიშტონი მოიწვია, რომელსაც დასავლეთ ევროპაში სასტუმროების ქსელის მართვისა და განვითარების 35 წლიანი გამოცდილება აქვს. სასტუმროს მშენებლობისათვის "ვისოლ ჯგუფმა" რამდენიმე მილიონი ლარის ინვესტიცია განახორციელა.

რა გახდა სასტუმრო „ლომსიას“ დახურვის მიზეზი, ოფიციალურ ინფორმაციას „სამხრეთის კარიბჭე“ სასტუმროს ხელმძღვანელობისგან ელოდება.



[თამარ თოთაძე, ახალციხე]