ბორჯომის გამგეობა სიგელებსა და მედლებს იმარაგებს

მედლების, თასების, სხვა ფასიანი საჩუქრების, ფეხბურთის, ფრენბურთისა და კალათბურთის ბურთების შესაძენად ბორჯომის მუნიციპალიტეტის გამგეობამ ტენდერი, სავარაუდო ღირებულებით, 5 314 ლარი, დღეს, 18 თებერვალს გამოაცხადა.

პირველი, მეორე და მესამე ადგილებისთვის გამგეობა მსგავსი პარამეტრების მედლებს ითხოვს: პირველი ადგილის ოქროსფერი, დიამეტრი არანაკლებ 6,0 სმ–სა, სპეციალური ყუთით და ჩამოსაკიდი ქამრით, რაოდენობა 82 ცალი; მეორე ადგილის ვერცხლისფერი, ასევე 82 ცალი და მესამე ადგილის ბრინჯაოსფერი - 95 ცალი. გარდა ამისა, გამგეობა 63 სპორტული თასის შეძენას აპირებს, აქედან: 5 ცალი 60 სანტიმეტრი სიმაღლის, 6 ცალი 40 სანტიმეტრის და 52 ცალი 23 სანტიმეტრის უნდა იყოს.

გამგეობა ასევე ყიდულობს: 11 ცალ სპორტული სახის საჩუქარს, არანაკლებ 25 ლარის ღირებულების და 1 ცალს არანაკლებ 50 ლარის ღირებულების; 60 ცალ რბილ სათამაშოს, არანაკლებ 7 ლარის ღირებულების და ბურთებს: 2 კალათბურთი, 8 ფეხბურთის და 2 ფრენბურთის.

კიდევ ერთი ტენდერი, ასევე დღეს, გამგეობამ 340 ცალი სიგელის შესაძენად გამოაცხადა. ტენდერის სავარაუდო ღირებულება 1020 ლარია. ბორჯომის მუნიციპალიტეტის მიერ ორგანიზებულ სპორტულ ტურნირებში (8 ტურნირი) გამარჯვებულების დასაჯილდოვებლად გამგეობა 340 ცალი სიგელის ბეჭდვასა და მიწოდებას ითხოვს.

როგორც ბორჯომის მუნიციპალიტეტის გამგეობაში განმარტავენ, აღნიშნულ მასალას გამგეობა 2014 წელს დაგეგმილი სხვადასხვა სპორტული ღონისძიებებისთვის იმარაგებს.

„ბორჯომის მუნიციპალიტეტი თითქმის ყოველ თვე აწყობს სხვადასხვა ღონისძიებებს, აჯილდოებს წარმატებულ ადამიანებს, სწორედ ამითვის არის საჭირო მედლები, თასები, ბურთები და სხვადასხვა სახის პრიზები“, - ამბობს ბორჯომის მუნიციპალიტეტის გამგეობის საფინანსო სამსახურის უფროსი მაია ბოჭორიშვილი.

აღნიშნულ ტენდერებში მონაწილეობის მსურველებისთვის განაცხადების მიღება 20 თებერვალს იწყება და 24 თებერვალს სრულდება.

[მანანა სარაშვილი, ბორჯომი]