ნასვამი მძღოლი ტბაში მანქანიანად აღმოჩნდა

შემთხვევა 28 ივნისს, საღამოს, იმ დროს მოხდა, როცა ფეხბურთის გულშემატკივრები ქალაქის ახალ, ჯერ ოფიციალურად გაუხსნელ გასართობი კომპლექსის ამფითეატრში დამონტაჟებულ ეკრანზე გერმანია-იტალიის საფეხბურთო მატჩს უყურებდნენ.

- ”იტალიამ მეორე გოლი რომ გაიტანა, ზუსტად იმ დროს ტბაში ”ოპელის” მარკის ავტომანქანა გადავარდა. თავიდან ხალხი ვერც კი მიხვდა რა ხდებოდა. ნაწილი გოლის განმეორებით ჩვენებას უყურებდა, ნაწილი კი შემთხვევის ადგილისკენ გარბოდა”, - გვიამბობს ერთ-ერთი თვითმხილველი, რომელიც იმ საღამოს იტალიის ნაკრებს გულშემატკივრობდა.

შემთხვევისკიდევ ერთ-ერთი თვითმხილველი კი ამბობს, რომ დაინახა როგორ მიდიოდა ტბისკენ დიდი სისწრაფით მომავალი მანქანა: ”დავინახე როგორ დაიძრა მანქანების სადგომმიდან დიდი სისწრაფით ტბისკენ, თავიდან მეგონა, მანქანის გარეცხვა უნდოდა. ხალხს არც სჯეროდა რა მოხდა, ამბობდნენ, ”რა მანქანა, იტალიამ გოლი გაიტანაო”.

მისივე თქმით, ვიდრე მანქანა ჩაიძირებოდა, მძღოლმა გადმოსვლა მოასწრო, ნაპირისკენ გაცურა და ადგილიდან მიიმალა.

შემთხვევის ადგილზე შეკრებილი ხალხიდან რამდენიმე ტბაში შევიდა, იმის გასარკვევად, იყო თუ არა ვინმე მანქანაში. დაახლოებით 10 წუთში შემთხვევის ადგილზე სასწრაფო და სამაშველო სამსახური მივიდა და ჩაძირული მანქანა ამოიყვანა. როგორც მოგვიანებით გაირკვა, მძღოლი მარტო იყო მანქანაში და ნასვამ მდგომარეობაში იმყოფებოდა.

[sknews.ge]