თვითმხილველი: პატრული ფეხითმოსიარულეს დაეჯახა

შემთხვევა, რომლის შესახებაც „სამხრეთის კარიბჭეს“ თვითმხილველებმა აცნობეს, 24 მაისს, თამარაშვილის ქუჩაზე, წრიულ მოედანთან, დაახლოებით 12:30 საათზე მოხდა.

მათი თქმით, საშუალო ასაკის მამაკაცი წრიულ მოედანთან ქუჩაზე ფეხით გადადიოდა, რა დროსაც მას პატრულის მანქანა დაეჯახა.

„პატრული სირენებით გარბოდა და უცებ კაცს დაარყა. კაცი მანქანასთან დაეცა, მაგრამ თვითონვე ადგა. მანქანაში ჩასვეს და საპატრულოში მიიყვანეს“, – ამბობს ერთ–ერთი თვითმხილველი, რომელმაც შემთხვევა საცხოვრებელი სახლის ფანჯრიდან დაინახა.

მეორე თვითმხილველის თქმით, რომელიც მიმდებარე ტერიტორიაზე ერთ–ერთ მაღაზიაში მუშაობს, ადგილზე სასწრაფო დახმარება არ გამოუძახებიათ. მათივე ინფორმაციით, საპატრულო პოლიციის მანქანას შემთხვევის შედეგად სანათი ფარი დაუზიანდა.

თვითმხილველების ნათქვამს კატეგორიულად გამორიცხავენ საქართველოს შინაგან საქმეთა სამინისტროში. საზოგადოებასთან ურთიერთობის სამსახურში ამბობენ, რომ მამაკაცი ქუჩაზე გადადიოდა, დაეცა და საპატრულო პოლიცია მის დასახმარებლად შეჩერდა.

„ამ ადამიანს ფეხი ისედაც სტკიოდა, ნატკენი ფეხი გადაუბრუნდა და წაიქცა. ეს რომ პატრულმა დაინახა, გააჩერა მანქანა და შეიყვანა შენობაში იმიტომ, რომ ენახა სჭირდა თუ არა რამე, რადგან სერიოზული არაფერი ჰქონდა, ტაქსი გამოიძახეს და სახლში გაუშვეს“, – განმარტეს შსს საზოგადოებასთან ურთიერთობის სამსახურში.

[თინათინ ზაზაძე, ახალციხე]