ფარავნის ტბასთან არქეოლოგებმა ყორღანული სამარხი და ბაზალტის ქვებით ნაგები შენობები შეისწავლეს [ფოტო]

საქართველოს კულტურული მემკვიდრეობის დაცვის ეროვნული სააგენტოს განცხადებით, ექსპედიცია გამოირჩევა სამეცნიერო, კომპლექსური მიდგომებით. მისი მთავარი მიზანია ფართოდ გაშლილი არქეოლოგიურო და სამეცნიერო კვლევები, რომელიც მიმართულია რეგიონის არქეოლოგიური პოტენციალის დასადგენად.

მიმდინარე 2020 წლის სეზონზე არქეოლოგიური გათხრები გაგრძელდა 2019 წელს დაწყებულ სამ უბანზე. პირველ უბანზე ექსპედიციამ შეისწავლა ყორღანული სამარხი. რომელიც 2018 წლის აეროდაზვერვებით გამოვლინდა, ხოლო მისი არქეოლოგიური შესწავლა 2019 წლის სეზონზე დაიწყო. ყორღანი იმით არის უნიკალური, რომ წარმოადგენს პირველ, სარიტუალო გზიან სამარხს ჯავახეთში. როგორც გათხრებმა გვიჩვენა სამარხი გაძარცვული იყო. მიუხედავად ამისა, აღმოჩენილი მასალა საინტერესო და საყურადღებოა. აქ ობსიდიანის ისრისთავებთან ერთად დადასტურდა გვიან ბრინჯაოს ადრეული ეტაპის კერამიკული ნაწარმი, რამაც მოგვცა საშუალება ძეგლი ძვ.წ. XVI-XV საუკუნეებით დაგვეთარიღებინა (დათარიღება წინასწარულია და არ წარმოადგენს საბოლოო ვერსიას).

მეორე უბანზე ექსპედიციამ შეისწავლა განვითარებული და გვიანი შუა საუკუნეების ნამოსახლარის ნაშთები, რომელიც სოფელ ახალ ხულგუმოში მცხოვრები ოჯახის საკუთრებაში არსებულ მიწაზე მდებარეობს. ძეგლი წინასწარი ვარაუდით ბაზალტის ქვებით ნაგებ „ბანურად გადახურულ“, სათავსო ნაგებობებს უნდა წარმოადგენდეს.

მესამე უბანი მდებარეობს შაორის მთის დასავლეთით. ის ასევე 2018 წლის აერო დაზვერვების შედეგად გამოვლინდა და 2019 წელს დაიწყო მისი არქეოლოგიური შესწავლა. ამ ნამოსახლარზე გათხრების მთავარი მიზანი მისი სტრატიგრაფიის დადგენა გახლდათ. გათხრების შედეგად გამოვლინდა ორფენიანი ძეგლი, თუმცა ის შესაძლოა არსებობას პირველი ათასწლეულშიც იწყებდეს. ფარავნის არქეოლოგიური ექსპედიციის ბაზაზე გრძელდება „საზაფხულო სკოლის“ საქმიანობაც რისთვისაც აქვე მოეწყო მცირე სამკითხველო.







[sknews.ge]