უნივერსიტეტებში სწავლა დისტანციური არ იქნება

განათლების მინისტრის ბრძანების მიხედვით, იმ უმაღლეს საგანმანათლებლო დაწესებულებას, რომელიც ვერ შეძლებს სასწავლო პროცესი განახორციელოს „იზოლაციისა და კარანტინის წესების დამტკიცების შესახებ“ კანონის შესაბამისად, გამონაკლისის სახით, უფლება მიეცემა სასწავლო პროგრამების თეორიული ნაწილი დისტანციურად წარმართოს.

იმ უმაღლეს საგანმანათლებლო დაწესებულებას რომლის სტუდენტი იმყოფება იზოლაციაში/კარანტინში გამონაკლისის სახით უფლება მიეცეს იზოლაციაში, კარანტინში მყოფი სტუდენტისათვის უმაღლესი საგანმანათლებლო პროგრამების სასწავლო კურსების თეორიული ნაწილი წარიმართოს დისტანციურად.

გარდა ამისა, ვალდებულია დაიცვას ჯანდაცვის სამინისტროს მიერ შემუშავებული რეკომენდაციები:

ვალდებულებები სასწავლო სივრცეებისთვის:

- პედაგოგები/ასისტენტები სამუშაო ადგილას გამოცხადნენ წინასწარ შედგენილი ცხრილის მიხედვით;
- პედაგოგები/ასისტენტები და სტუდენტები მაგიდებთან არ განათავსოთ ერთმანეთის პირისპირ;
- ინტენსიურად გამოიყენეთ ბუნებრივი ვენტილაცია;
- უზრუნველყავით სამუშაო ადგილზე ხელის პერიოდული დეზინფექციისთვის საჭირო სულ მცირე 70% ალკოჰოლის შემცველი ხელის დასამუშავებელი ხსნარის განთავსება;
- არ დაუშვათ სამუშაო სივრცეში პედაგოგების/ასისტენტები და სტუდენტები, სამუშაოს სპეციფიკიდან გამომდინარე, აუცილებელი ინდივიდუალური დაცვის საშუალების გარეშე, მათ შორის:

• ნიღაბი;
• ხელთათმანი;
• სახის დამცავი ფარი;
• საჭიროების შემთხვევაში, ბახილები;
• სპეც. ტანსაცმელი/ხალათი;

- უზრუნველყავით გამოყენებული ერთჯერადი ხელსახოცებისა თუ სხვა გამოყენებული ჰიგიენური ნარჩენებისთვის დახურული კონტეინერების განთავსება, რომელშიც ჩაფენილი იქნება ერთჯერადი პლასტიკური პაკეტი. ნარჩენების პარკის ამოღება და განკარგვა მოახდინეთ ერთჯერადი ხელთათმანების გამოყენებით. უზრუნველყავით ასეთი ნარჩენების დროული გატანა შესაბამისი პირის/სამსახურის მიერ.

პედაგოგთა/თანამშრომლეთა და სტუდენტთა ვალდებულებები:

- დაიცავით ჰიგიენის წესები სასწავლო დაწესებულების სივრცეში;
- გამოიყენეთ სრულად ინდივიდუალური დაცვის საშუალებები;
- ჩაიტარეთ ხელების ადეკვატური ჰიგიენა (სულ მცირე 70% სპირტის შემცველი ხელის საწმენდი საშუალებების გამოყენება იმ შემთხვევაში, როცა ვერ ხერხდება ხელების დაბანა. ხილული დაბინძურების, ან ბიოლოგიური სითხეების მოხვედრისას სავალდებულოა ხელების წყლითა და საპნით დაბანა);
- მოერიდეთ ხელებით თვალებზე, ცხვირსა და პირზე შეხებას. მუშაობის პერიოდში უზრუნველყავით თმის შეკვრა/მჭიდროდ დამაგრება, რათა მაქსიმალურად შეიზღუდოს თმების სახის ზედაპირთან შეხება.

ვრცლად რეკომენდაციების შესახებ, ნახეთ ვებ გვერდზე moh.gov.ge

[თაკო ფეიქრიშვილი]