როგორ დაიწყეს სეზონი სამცხე–ჯავახეთის საფეხბურთო კლუბებმა

რეგიონულ ლიგაში, სადაც სამცხე–ჯავახეთიდან ახალციხის „მესხეთი“, „სამცხე“, ახალქალაქის „აბული“ და ბორჯომის „თორი“ თამაშობენ ,კლუბებმა ტურნირზე სამ–სამი მატჩი უკვე ჩაატარეს, საიდანაც ტურნირის დებიუტანტმა „სამცხემ“ ორში დამაჯერებლად გაიმარჯვა, ერთში კი დამარცხდა. მესამე ტურისთვის კლუბს ექვსი ქულა აქვს და ცხრილში მესამე პოზიციას იკავებს.

შემდეგ მატჩს „სამცხე“ 9 სექტემბერს, სტუმრად კლუბ „ლეგიონთან“ გამართავს.

სამი მატჩიდან მხოლოდ ერთში მოიპოვა გამარჯვება ბორჯომის „თორმა“, ორში კი დამარცხდა, რითაც ტურნირში მეათე ადგფილს 3 ქულით იკავებს. შემდეგ მატჩს კლუბი 9 სექტემბერს სტუმრად „ლიახვი აჩაბეთთან“ გამართავს.

მხოლოდ ერთი ქულის მოპოვება შეძლო სამ შეხვედრაში ახალციხის „მესხეთმა“, რომელიც ორ შეხვედრაში დამარცხდა, ერთში კი ფრედ ჩატარებული მატჩის შემდეგ, ცხრილში მე–13 პოზიციას იკავებს.

მორიგი საშინაო მატჩი „მესხეთს“ „დინამო სოხუმთან“ 9 სექტემბერს აქვს.

რეგიონ ლიგა საქართველოს ჩემპიონატებს შორის ყველაზე დაბალი ლიგაა, სადაც თითო ჯგუფში წლევანდელ სეზონზე 14 გუნდი მონაწილეობს.

ტურნირის საპრიზო ადგილზე დასრულების შემთხვევაში გუნდებს აქვთ შესაძლებლობა მომდევნო სეზონში რანგით უფრო მაღალ „მეოთხე ლიგაში“ თამაშის.

სამცხე–ჯავახეთიდან ყველაზე წარმატებულ კლუბად ბორჯომის „ბორჯომი“ ითვლება, რომელიც გასულ წელს მესამე, წელს კი მეოთხე ლიგაზე ასპარეზობს.

მიმდინარე სეზონზე გამართული ორი შეხვედრიდან კლუბმა მხოლოდ ერთი ქულის მოპოვება კლუბ „იმერეთთან“ ფრედ გამართული მატჩის წყალობით (2:2) მოახერხა, ბოლო შეხვედრა კი „ოდიში 1919“–თან წააგო(3:2). ორი ტურის მონაცემებით, ბორჯომი რვიდან მეექვსე პოზიციას იკავებს.

მომდევნო მატჩს ბორჯომი „ვიტ–ჯორჯია 2“–თან 11 სექტემბერს მცხეთის სტადიონზე გამართავს.

უკვე ორი წელია სამცხე–ჯავახეთიდან ქალთა ეროვნულ ლიგაზე ასპარეზობს ადგილობრივი კლუბი „ზარზმა“ რომელმაც გამართული ხუთი შეხვედრიდან ორში მოიპოვა გამარჯვება, მათ შორის ბოლო შეხვედრა დამაჯერებლად, საფეხბურთო კლუბ „მცხეთასთან“ ანგარიშით 3:0.

მეხუთე ტურის ბოლოს „ზარზმა“ 6 ქულით მერვე ადგილს იკავებს ტურნირზე, სადაც 14 გუნდი მონაწილეობს.

მორიგი მატჩი სამცხე–ჯავახეთის ქალთა კლუბს 12 სექტემბერს „დინამო სოხუმთან“ აქვს.

საფეხბურთო სეზონი პანდემიის გამო დაგვიანებით, აგვისტოში დაიწყო.

[რობი ზარიძე]