ახალციხის საკრებულო ყოფილ თანამშრომლებს 44 000 ლარამდე კომპენსაციას გადაუხდის

ეკა ტატალაშვილი და თეა ბაღდოშვილი ქალაქ ახალციხის და ახალციხის მუნიციპალიტეტის გაერთიანების შემდეგ, 2017 წლის პირველ დეკემბერს გაათავისუფლეს.

სამივე ინსტანციის სასამართლომ მიიჩნია, რომ მათი გათავისუფლება უკანონოდ მოხდა, ამიტომ ახალციხის მუნიციპალიტეტის საკრებულოს, ბიუჯეტიდან მათ სასარგებლოდ დაახლოებით 44 000 ლარის გადახდა მოუწევს.

კონკრეტულად რამდენი დაერიცხება თითოეულ მათგანს მაშინ გაირკვევა, როცა უზენაესი სასამართლოს გადაწყვეტილება საბოლოოდ აღსრულდება, ეკა ტატალაშვილი არ გამორიცხავს, რომ ახალციხის ადგილობრივ საკანონმდებლო ორგანოს ხელმძღვანელობას ხელმეორედ უჩივლოს, რადგან როგორც მისთვის ცნობილია, საკრებულო კუთვნილი თანხის სრულად ჩარიცხვას არ გეგმავს.

„მე რადგან ვარ დეპუტატი და ბიუჯეტიდან ვიღებ ხელფასს, საკრებულოში ფიქრობენ, რომ იძულებით განაცდური საათები დეპუტატად არჩევამდე უნდა ამინაზღაურონ. სასამართლომ იმსჯელა და თქვა, რომ დეპუტატად არჩევა აღნიშნულ საქმესთან კავშირში არ არის. ესენი კი ამბობენ, რომ არ გეკუთვნისო“, – ამბობს „სამხრეთის კარიბჭესთან“ ეკა ტატალაშვილი.

მისი თქმით, გარდა აღნიშნულისა, საკრებულო გეგმავს საშემოსავლო გადასახადი ხელზე ასაღები თანხიდან ჩამოაჭრას, რაც დარღვევაა.

„უზენაეს სასამართლოს გადაწყვეტილებაში ნათქვამი აქვს, რომ მე თვეში, ხელზე ასაღები თანხა გამომდის 560 ლარი, ესენი [საკრებულო] კი მეუბნებიან, რომ პროგრამაში ვერ შედიან და 560–დან უნდა დაიკავონ საშემოსავლო გადასახადი. მე ველოდები რა თანხა ჩამერიცხება, თუ 560–დან დამიბეგრეს, ამასაც გავასაჩივრებ“, – ამბობს ტატალაშვილი.

ტატალაშვილი „ევროპული საქართველოდან“ ახალციხის მუნიციპალიტეტის საკრებულოში დეპუტატად 2018 წლის 7 სექტემბერს შევიდა, მან გელა დემეტრაძე ჩაანაცვლა.

ახალციხის საკრებულოს თავმჯდომარე გელა ნოზაძე აცხადებს, რომ ეკა ტატალაშვილთან და თეა ბაღდოშვილთან დაკავშირებით, თანხის დარიცხვა კანონის შესაბამისად მოხდება და არც ერთ მათგანს იძულებით განაცდური საათების და კომპენსაციის ოდენობას არაფერი დააკლდება.

„უზენაეს სასამართლოში ჩვენ გაგზავნილი გვაქვს შეკითხვა, ზუსტ პასუხს ვერავინ გვაძლევს, როგორ უნდა მოხდეს ბიუჯეტიდან თანხის გაცემა, რადგან ის 2018 წლიდან ისედაც იღებს ხელფასს, როგორც საკრებულოს დეპუტატი. რაც შეეხება 560 ლარის დაბეგვრას, ეს სიცრუეა. რაც მათ ეკუთვნით მიიღებენ, ერთი თეთრი არ დააკლდებათ. უბრალოდ ჩვენ ვართ გაურკვევლობაში როგორ უნდა მოხდეს ანაზღაურება, სხვა არაფერი, ჩვენ არავის ინტერესი გვაქვს“, – ამბობს გელა ნოზაძე.

ეკა ტატალაშვილი 2014 წლიდან, ახალციხის თემის საკრებულოში, კადრების და წერილების საკითხებში, უფროსი სპეციალისტის პოზიციაზე მუშაობდა. 2015 წლის იანვრიდან, ქალაქის საკრებულოში, საორგანიზაციო საკითხებში სპეციალისტი იყო თეა ბაღდოშვილი. რანგირების მიხედვით, ორივე მათგანს მესამე რანგის მეორე კატეგორიის უფროსი სპეციალისტის წოდება ჰქონდა. თემისა და ქალაქის გაერთიანებისა და მუნიციპალიტეტების რეორგანიზაციის შემდეგ, თვითმმართველობაში არცერთი მათგანი აღარ დაასაქმეს. ისინი მიიჩნევენ, რომ მათი გათავისუფლება პოლიტიკური ნიშნით მოხდა. რასაც კატეგორიულად უარყოფს საკრებულოს თავმჯდომარე გელა ნოზაძე.

[თინათინ ზაზაძე]