‘კომპენსაციას დავთანხმდებით’ – რატომ ვერ დაბრუნდნენ სამსახურში საკრებულოდან გათავისუფლებული თანამშრომლები

ახალციხის საკრებულოს, ყოფილი სპეციალისტი საორგანიზაციო საკითხებში, თეა ბაღდოშვილი ამბობს, რომ რადგან შეთავაზებული 67 ვაკანტური პოზიციიდან არც ერთი მათგანი სამცხე–ჯავახეთში არ არის, იძულებულია ექვსი თვის კომპენსაცია მიიღოს და რეზერვში ჩაეწეროს.

„ჩვენი რეგიონის გარდა ყველგან შემომთავაზეს ვაკანტური ადგილი, ახმეტის მუნიციპალიტეტში, მთავრობის ადმინისტრაციაში... ფიზიკურად ვერ ვახერხებ წასვლას, ვერ დავთანხმდები. ამ ეტაპზე შეთავაზებულ პოზიციებზე უარს ვიტყვი, დანარჩენს მომავალი გვიჩვენებს“, - ამბობს თეა ბაღდოშვილი.

იგივე პასუხი აქვს ეკა ტატალაშვილსაც, რომელიც წლების განმავლობაში ახალციხის საკრებულოში, კადრების და წერილების საკითხებში, უფროსი სპეციალისტი იყო.

„შეთავაზებული ვაკანტური პოზიციებიდან ჩვენი რეგიონიდან არც ერთი მუნიციპალიტეტი არ არის. ძირითადად არის ახმეტა, აბაშა, თბილისი. როგორც ვიცი მერიას აქვს შვიდი ვაკანსია და რატომღაც აქედან არ არის შემოთავაზება. ტერიტორიულად არ მაწყობს, ამიტომაც ვერ დავთანხმდები. მე რომ განვაცხადებ უარს კანონის შესაბამისად მეკუთვნის რეზერვში ჩარიცხვა და ექვსი თვის თანამდებობრივი სარგო კომპენსაციის სახით“, - აცხადებს ეკა ტატალაშვილი.

ამ დრომდე არც ერთ მათგანს შეთავაზებულ ვაკანსიებზე უარი ოფიციალურად არ განუცხადებია.

ახალციხის საკრებულოს თავმჯდომარე გელა ნოზაძე ამბობს, რომ ყოფილ თანამშრომლებს ვადა ხვალ, 25 აგვისტომდე აქვთ.

„გადაგზავნილია ვაკანსიების ჩამონათვალი, რომელიც მთელი საქართველოს მასშტაბით არის, ვადა აქვთ და ველოდებით პასუხს“, - განმარტა გელა ნოზაძემ.

რაც შეეხება შვიდ ვაკანტურ პოზიციას ახალციხის მერიაში, გელა ნოზაძე აცხადებს, რომ უმეტესობა ამ პოზიციებიდან ეკა ტატალაშვილის და თეა ბაღდოშვილის მაშინდელ საქმიანობასთან კავშირში არ არის: "მერიაში ზედამხედველობის და მშენებლობის სპეციალისტებს ითხოვენ, არცერთს არ უმუშავია ამ კუთხით საკრებულოში. მე არ ვიცი რატომ არ შესთავაზა ეს ვაკანსია საჯარო სამსახურის ეროვნულმა ბიურომ".

მუნიციპალიტეტის რეორგანიზაციის შემდეგ საკრებულოდან გათავისუფლებულმა თანამშრომლებმა ეკა ტატალაშვილმა და თეა ბაღდოშვილმა, ახალციხის რაიონულ სასამართლოს 2018 წელს მიმართეს და საქმე მოიგეს კიდეც. პირველი ინსტანციის გადაწყვეტილება საკრებულომ ჯერ სააპელაციოში, შემდეგ კი უზენაესში გაასაჩივრა, თუმცა წააგო. საკანონმდებლო ორგანოს ინტერესებს ახალციხის სასამართლოში დაქირავებული ადვოკატი იცავდა.

ეკა ტატალაშვილი 2014 წლიდან, ახალციხის თემის საკრებულოში, კადრების და წერილების საკითხებში, უფროსი სპეციალისტის პოზიციაზე მუშაობდა. 2015 წლის იანვრიდან, ქალაქის საკრებულოში, საორგანიზაციო საკითხებში სპეციალისტი იყო თეა ბაღდოშვილი. რანგირების მიხედვით, ორივე მათგანს მესამე რანგის მეორე კატეგორიის უფროსი სპეციალისტის წოდება ჰქონდა. თემისა და ქალაქის გაერთიანებისა და მუნიციპალიტეტების რეორგანიზაციის შემდეგ, თვითმმართველობაში არცერთი მათგანი აღარ დაასაქმეს. ისინი მიიჩნევენ, რომ მათი გათავისუფლება პოლიტიკური ნიშნით მოხდა. რასაც კატეგორიულად უარყოფს საკრებულოს თავმჯდომარე გელა ნოზაძე.

[რიმა სარუხანიან]