‘გასულ წელს დაგვპირდნენ და მოგვატყუეს’ – მუგარეთში ისევ წყლის პრობლემა აქვთ

მუგარეთში დაახლოებით 100 ოჯახი ცხოვრობს, როგორც ადგილობრივები ამბობენ, სოფელი სასმელი წყლით ე.წ ჩანჩხურის სათავედან მარაგდება, იმის გამო, რომ დებეტი ძალიან მცირეა, წყალი მხოლოდ 20 ოჯახს ჰყოფნის. ამის გამო ხშირია მეზობლებს შორის დაპირისპირებაც.

„სანამ ცოცხალი ვარ ნეტავ მეღირსებოდეს წყლის ონკანიდან ავსება. შეგვპირდნენ შარშან, რომ სოფელს წყალი ექნებოდა, მაგრამ მოგვატყუეს. არც სასმელი და არც სარწყავი წყალი არ გვაქვს. საქონელს ვერ ვასმევთ, ბოსტანს ვერ ვრწყავთ და ყანები საერთოდ გამხმარი გვაქვს. თვითონ ზაზა მელიქიძეც იყო ჩამოსული დაგვპირდა, რომ გააკეთებდა, მაგრამ არ გაკეთდა“, – ამბობს ნაზი ტაბატაძე.

წლებია უშედეგოდ ელოდება სოფლის ყველაზე მთავარი პრობლემის მოგვარებას ლენა ლომიძეც, იგი წყალს მეზობელი დასახლებიდან, ფერსიდან ეზიდება: „გვეუბნებიან წინუბნის აბანოებამდე არის ჩამოსული წყალიო, მუგარეთამდე რომ გაკეთდეს არც პროექტი აქვთ და არც საკმარისი თანხა“.

ადგილობრივის, ჯუმბერ ტაბატაძის თქმით, სოფლამდე წყალი ისევ ძველი, „საბჭოთა კავშირის დროს გაკეთებული სისტემით მოდის“.

„სოფელ წინუბანში სათავე–ნაგებობა და მაგისტრალური წყალსადენი გასულ წელს გაკეთდა. გვითხრეს, რომ ჩვენც იმ სისტემით მოგვცემდნენ წყალს, ჩვენთან ისევ ის ძველი სისტემაა, ძალიან მცირე რაოდნეობით მოდის წყალი“, – ამბობს ჯუმბერ ტაბატაძე.

გარდა სასმელი და სარწყავი წყლისა, ადგილობრივებს ხელისუფლებისგან სხვა დაპირებაც ახსოვთ: „სასაფლაოს გზის მოწესრიგებას დაგვპირდნენ და არ გააკეთეს, სამხიდიანი მანქანებით მიგვყავს მიცვალებულები“.

სოფელ წინუბანში სასმელი წყლის სათავე–ნაგებობა და მაგისტრალური წყალსადენი გასულ წელს გაკეთდა. მაშინ ადგილობრივ თვითმმართველობაში განაცხადეს, რომ ახალი წყალსადენით ხუთი სოფლის, მათ შორის მუგარეთის მოსახლეობა ისარგებლებდა, სამუშაოებისთვის 894 895 ლარი დაიხარჯა.

ახალციხის მერმა, ზაზა მელიქიძემ „სამხრეთის კარიბჭესთან“ განმარტა, რომ მუგარეთში წყლის პრობლემის მოგვარების მიზნით, რეაბილიტაციის მეორე ეტაპი იგეგმება. ამის შემდეგ სოფელს მუდმივი წყალი ექნება. ამ ეტაპზე წინუბნის სათავე ნაგებობიდან მუგარეთის მიმართულებით, წყლის ახალი მილი, დაახლოებით 3–4 კილომეტრამდეა გაყვანილი. სამუშაოების დასასრულებლად კიდევ ერთი ტენდერი უნდა გამოცხადდეს.

„მეორე ეტაპის დასრულების შემდეგ, სრულად მომარაგდება სოფელი. ტენდერი უახლოეს მომავალში გამოცხადდება“, – ამბობს ზაზა მელიქიძე.





[რიმა სარუხანიან]