ბორჯომის მხარეთმცოდნეობის მუზეუმმა დამთვალიერებლების მიღება განაახლა

დირექტორი თინათინ მამასტარაშვილი ამბობს, რომ მუზეუმში კორონავირუსთან დაკავშირებით, უსაფრთხოების ნორმები დაცულია. დაწესებულება მსოფილიო ჯანდაცვის ორგანზაციის მიერ შემუშავებულ ყველა რეკომენდაციას ითვალისწინებს.

„დამთვალიერებლები გაივლიან თერმოსკრინინგს, ერთდროულად მხოლოდ 10 სტუმარს შეეძლება შემოსვლა. გვაქვს დეზობარიერები და ვითვალისწინებთ ყველა რეკომენდაციას“,– ამბობს თინათინ მამასტარაშვილი.

მისი თქმით, მუზეუმში შესვლის ფასი უცვლელი რჩება. როგორც ადგილობრივების, ასვე უცხოელი ტურისტებისთვის 5 ლარია. უცვლელი რჩება გიდების მომსახურების ღირებულებაც.

„ქართულენოვანი გიდის მომსახურება იქნება 15 ლარი, უცხოენოვანის 30 ლარი, იქიდან გამომდინარე, რომ 10 კაცზე მეტს ვერ ვუშვებთ, ჯგუფი გაიყოფა ორ ნაწილად და მოვემსახურებით ერთი გიდის ფასად“,– განმარტა მამასტარაშვილმა.

კორონავირუსის პანდემიის გამო, ბორჯომის მხარეთმცოდნეობის მუზეუმი 2020 წლის 8 მარტიდან იყო დაკეტილი.

მიმდინარე წელს მუზეუმის შენიბის სრული რეაბილიტაცია იგეგმებოდა, თუმცა გადაიდო. კულტურული მემკვიდრეობის ეროვნულ სააგენტოში აცხადებენ, რომ ფინანსური პრობლემები შეექმნათ, ამიტომ ტენდერი ვერ გამოაცხადეს.

„გადაიდო კოვიდის გამო, დროშიც ვერ ესწრებოდა, გარკვეული ფინანსური პრობლემებიც წარმოიქმნა, ამიტომ ჯერჯერობით საკითხი ისევ ღიაა, მაგრამ როგორც კი ცოტა გაგვიუმჯობესდება ფინანსური მდგომარეობა, მაშინვე დავიწყებთ ამ პროცესს“, – განაცხადა მიმდინარე წლის 5 აგვისტოს კულტურული დაცვის ეროვნული სააგენტოს ხელმძღვანელმა, ნიკოლოზ ანთიძემ.

[ნუკა სტეფნაძე]