‘27 წელია გზის გაკეთებას ვიხვეწები’ – ‘დევნილთა დასახლებაში’ ასფალტის დაგებას ითხოვენ

რუსთაველის N113–ში მდებარე კორპუსებში მეტწილად აფხაზეთიდან დევნილი მოსახლეობა ცხოვრობს. აქაურობას უკვე „დევნილთა დასახლება“ ჰქვია.

„დევნილთა დასახლებაში“ საზოგადოებრივი ტრანსპორტი არ დადის. საქალაქთაშორისო მიკორავტობუსი მხოლოდ დაბლა, ცენტრალურ გზამდე მოდის და უკან ბრუნდება და საიდანაც ცუდი გზა იწყება მოსახლეობას ფეხით უწევთ ასვლა.

„დევნილთა დასახლებიდან“ ბავშვები სკოლაში, საბავშვო ბაღში დადიან.

დასახლებაში არ არის სასურსათო მაღაზია, აქ მცხოვრებნი ამბობენ, რომ ტაქსებით უწევთ გადაადგილება და ცუდი გზის გამო ტაქსიც მეტ თანხას ითხოვს.

ნაზი მიქაია დევნილია გაგრიდან. ახლა „დევნილთა დასახლებაში“ ცხოვრობს – „27 წელია აქ ვარ და 27 წელია გზის გაკეთებას ვიხვეწები“,– ამბობს ის.

„ბევრჯერ მივმართეთ ადგილობრივ ხელისუფლებას, დაგვპირდნენ გავაკეთებთო, ორი კვირის წინ გზის გაფართოება დაიწყეს, იმედია გააკეთებენ“, – ამბობს ნელი მღებრიშვილი.

პავლე მერაბიშვილს ორი შვილი ჰყავს და ყოველდღიურად უწევს ამ გზის რამდენჯერმე გავლა, ამბობს, რომ უგზოობა აწუხებს და კარგი იქნებოდა ამ პრობლემისთვის ხელისუფლებას დროულად მიეხედა.

გზა, რომლის გაკეთებასაც მოსახლეობა ითხოვს დაახლოებით 400 მეტრია.

ახალციხის მუნიციპალიტეტის მერიაში გვიპასუხეს, რომ ამჯერად მიმდინარეობს რუსთაველის ქუჩის რეაბილიტაციის მესამე, დამამთავრებელი ეტაპი. პროექტი ითვალისწინებს გზის რეაბილიტაციას, ცენტრალური მაგისტრალიდან რუსთაველის ქუჩა N125 კორპუსამდე.

რუსთაველის N125 კორპუსი რომელია „დევნილთა დასახლებაში“ ვერ გვითხრეს, თუმცა მოსახლეობა, ამბობს, რომ რადგან სწორედ ამ ნომრამდე მოხდება ასფალტის საფარის დაგება, შესაძლოა ამ მონაკვეთში რუსთაველის N113 მოხვდეს.

„დიდი იმედი არ გვაქვს, რომ გზას დაგვიგებენ, თუმცა დაველოდოთ, ნათქვამია აღდგომა და ხვალეო“, – ამბობს დასახლებაში მცხოვრები კაცი.

[გულო კოხოძე, ახალციხე]