სომხურმა სამოციქულო ეკლესიამ 'ვარდავარი' იზეიმა [Photo]

ფოტო – სერგეი ფიდანიანი

დღეს, 8 ივლისს, "ვარდავარის" დღესასწაული რელიგიური ლიტურგიით დაიწყო, რომელიც ახალციხის სოფელ წყრუთთან ახლოს, ნაეკლესიარ ადგილზე აღევლინა – "ამ ადგილს, ჩვენ "დედა ეკლესიას" ვეძახით და დღეს ლიტურგია სწორედ აქ ჩავატარეთ", – განმარტავენ ადგილობრივები.

სადღესასწაულო ლიტურგიის შემდეგ, კი ტრადიციად ქცეული წუწაობის რიტუალი ქალაქის ქუჩებში გაგრძელდა.

სომხურ ტრადიციულ დღესასწაულთა შორის "ვარდავარი" ზაფხულის ყველაზე დიდი დღესასწაულია, რომელსაც ათასწლეულების ისტორია აქვს.

წარმართულ სომხეთში, იგი უკავშირდებოდა სიყვარულისა და სილამაზის ქალღმერთს - ასტღიკს.

ქრისტიანობის მიღების შემდგომ კი დღესასწაულმა სახე იცვალა, მაგრამ შეინარჩუნა თავისი არსი. ეკლესია მას უკავშირებს ფერისცვალების დღესასწაულს, რომელიც სახარების თანახმად, თაბორის მთაზე მოხდა. ამ დროს, იესო ქრისტე მოციქულებთან ერთად ავიდა მთაზე და ნათლით შეიმოსა, ფერი იცვალა. სახარებაში ნათქვამია, რომ ქრისტეს სამოსი გასხივოსნებული იყო.

სწორედ ეს დღესასწაული დაედო საფუძვლად ერთმანეთისთვის წყლის შესხმას, წუწაობის ძველ ტრადიციას. წყლის შესხმის დროს მორწმუნეები ერთმანეთს ჯანმრთელობასა და წარმატებას უსურვებენ. მათი რწმენით, წყალი განასახიერებს საღმრთო მადლს.

"ვარდავარი" მოძრავი დღესასწაულია, რომელსაც სომხური სამოციქულო მართლმადიდებელი ეკლესია აღდგომიდან 98–ე დღეს აღნიშნავს.

ფოტო – სერგეი ფიდანიანი

ლიტურგია სოფელ წყრუთთან

ლიტურგია სოფელ წყრუთთან

[თაკო ფეიქრიშვილი, ახალციხე]