2020 წლის არჩევნებში რეგისტრაციისთვის ცესკოს 68 პარტიამ მიმართა

14 ივლისს, რეგისტრაციის ვადის ამოწურვის შემდეგ, ცესკოში განაცხადი 68 პარტიას აქვს წარდგენილი. მათგან განხილვაშია 53, 14 -მა საარჩევნო რეგისტრაცია გაიარა, ხოლო ერთს უარი ეთქვა რეგისტრაციაზე.

ეს მხოლოდ ის პარტიებია, რომლებსაც არ ჰყავთ წარდგენით არჩეული პარლამენტის წევრი. მათ რეგისტრაციისთვის 1 იანვრიდან 15 ივლისამდე უნდა მიემართათ.

პარტიებს, რომლებსაც ჰყავთ მათი წარდგენით არჩეული პარლამენტის წევრი, შესაძლებლობა ექნებათ პარლამენტის არჩევნებში მონაწილეობის უფლების მისაღებად, საარჩევნო რეგისტრაციისთვის მიმართონ ცესკოს, არჩევნების დანიშვნის შემდეგ, არჩევნების დღემდე არაუგვიანეს 57-ე დღისა (საქართველოს საარჩევნო კოდექსი, მუხლი 197).

პოლიტიკური პარტიების რეგისტრაციის პროცესი 2020 წლის 29 ივნისს მიღებული საკონსტიტუციო ცვლილებების შესაბამისად ხორციელდება.

[sknews.ge]