გუბერნატორის ყოფილი მოადგილის კომპანიას არალში ადგილობრივი ღობის დაზიანებაში ადანაშაულებს

არლის საჯარო სკოლამდე მისასვლელი გზა შარშან შემოდგომით გააკეთეს. შუშკა ჩილინგარაშვილი გვიყვება, რომ როცა ასფალტის საფარი დაიგო და გზა ამაღლდა, მისი ღობე ქვეშ მოჰყვა. მშენებელი კომპანიის დირექტორს, ავთანდილ კაჭკაჭიშვილს პრობლემის შესახებ მაშინ მოუყვა, როცა ის სამუშაოების დასათვალიერებლად ადგილზე იმყოფებოდა.

„ჯერ მუშებს ვთხოვე რომ არმატურები მაინც გაესწორებინათ, მაგრამ მითხრეს ეს რომ გავასწოროთ, გზა გაფუჭდებაო. ამის მერე დირექტორი იყო მოსული აქ და მივედი, ვუთხარი ღობის შესახებ და მითხრა, რომ გააკეთებდნენ. მე მარტო არმატურების და სეტკის გასწორება მინდოდა, ავთანდილ კაჭკაჭაშვილმა კი მითხრა რომ ახალ სეტკასაც მოიტანდნენ და მუშებს ღობეც გააზომვინა. ერთ კვირაში გავაკეთებთო. ამის შემდეგ ველოდები. ტელეფონზეც დავურეკე და აღარ მპასუხობს,“ – გვიყვება შუშკა და ამატებს, რომ ამის შემდეგ საქმის კურსში მერის წარმომადგენელიც ჩააყენა, თუმცა რეაგირება არც მისი მხრიდან მოჰყოლია ამ საკითხს.

„სოფლის გამგებელსაც ვუთხარი, მაგრამ მაინც არაფერი. მარტო ვცხოვრობ, ვინმე რომ მყავდეს, ამას ჩემითაც გავაკეთებდი, როგორც ეს სხვა მეზობლებმა გააკეთეს, მაგრამ არ შემიძლია. მეზობლები მომეხმარნენ და ტოტები ჩავყარეთ, საქონელი რომ არ შევიდეს, შარშან შემოდგომიდან ასეა,“ – ამბობს შუშკა.

მეზობლებიც გვიდასტურებენ, რომ ღობე გზის მშენებლობისას მათაც დაუზიანდათ, თუმცა ამ პრობლემით არავისთვის მიუმართავთ და თავიანთი სახსრებით გააკეთეს.

„ერთხელ ვიკითხე მარტო, ვინც აკეთებდა გზას იმათთან და პროექტში არ გვიზისო, მერე ჩემით გავაკეთე, დაახლოებით ათასი ლარი დამიჯდა,“ – ამბობს ჯემალი, შუშკა ჩილინგარაშვილის მეზობელი.

„სამხრეთის კარიბჭე“ სამცხე–ჯავახეთის მხარის რწმუნებულის ყოფილ მოადგილეს, შპს "საგზაო სამშენებლო სამმართველო N2" – ის დირექტორს ავთანდილ კაჭკაჭაშვილს დაუკავშირდა, იგი აცხადებს, რომ სამუშაოების დროს ადგილობრივის ღობეები არ დაუზიანებია და არც გაკეთებას დაპირებია ვინმეს.

„არანაირი ღობის გაკეთება პროექტში არ ყოფილა. არც არავის დავპირებივარ რომ ღობეს შევუკეთებდი. წარმოდგენა არ მაქვს ვისზე საუბრობთ. ჩვენ არც არანაირი ღობე დაგვინგრევია და არც გაკეთება უთხოვია არავის, რომც ეთხოვათ ვერ გავაკეთებდით, პროექტის გარეშე საიდან გავაკეთებდით. ჩვენ რომ დაგვეზიანებინა, მე ამას შევუთანხმებდი მუნიციპალიტეტს და მათი დავალებით, გავაკეთებდი კიდეც, მაგრამ მე არაფერი მახსენდება ისეთი, რომ ჩვენ რამე დაგვეზიანებინოს და ისე დაგვეტოვა“ – ამბობს ავთანდილ კაჭკაჭაშვილი, შპს "საგზაო სამშენებლო სამმართველო N2" – ის დირექტორი.

შუშკა ჩილინგარაშვილის მონაყოლს უარყოფს მერის წარმომადგენელიც, რომელიც ამბობს რომ ყველაფერი ახლა, ჩვენგან შეიტყო.

„ჩემთვის არავის არ მოუმართავს, ახლა გავიგე პირველად და გავერკვევი ყველაფერში“ – გვითხრა მერის წარმომადგენელმა, დავით აკოფაშვილმა სატელეფონო საუბრისას.

სკოლამდე მისასვლელი გზის რეაბლიტაციისთვის ჯამში 108 000 ლარი დაიხარჯა.



[რობი ზარიძე, ადიგენი]