'საზოგადოების ნაწილს არ სჯერა... კორონავირუსით დაღუპულთა მონაცემებს გამოვაქვეყნებთ'- ფაშინიანი

18 ივნისის მონაცემებით, სომხეთში COVID-19-ით კიდევ 665 ადამიანი დაინფიცირდა, გამოჯანმრთელდა 746 ადამიანი, ხოლო 7 გარდაიცვალა.

სომხეთის პრემიერ–მინისტრმა ნიკოლ ფაშინიანმა, დღეს მთავრობის სხდომაზე განაცხადა, რომ დაიწყებენ ყველა გარდაცვლილის მონაცემების გამოქვეყნებას.

“საზოგადოების დიდ ნაწილს არ სჯერა, რომ სომხეთში არიან კორონავირუსით დაღუპული ადამიანები, არ სჯერა, რომ რეანიმაციულ განყოფილებაში არიან ადამიანები, არ სჯერა, რომ მათ გვერდით კორპუსებში ცხოვრობენ კორონავირუსით დაინფიცირებული ადამიანები. სოციალურ ქსელებში ბევრი სისულელე იწერება, მაგალითად კოროვირუსი არ არსებობს, ავარიაში დაზარალებულთა ნათესავებს ფულს უხდიან, რომ თქვან მათი ახლობელი კორონავირუსით გარდაიცვალა და ა.შ.“, – განაცხადა ნიკოლ ფაშინიანმა.

მისივე თქმით, ასევე უნდა გასაჯაროვდეს იმ ადამიანების ვინაობაც, რომელთა ოჯახის წევრები კორონავირუსით ინფიცირებულები არიან, მაგრამ სოციალურ ქსელში წერენ, რომ კორონავირუსის არ სჯერათ.

ქვეყანაში ინფიცირების შემთხვევათა რაოდენობა 18 698–მდე გაიზარდა, აქედან გამოჯანმრთელდა 7 560 პაციენტი, გარდაიცვალა 309.

ქვეყნის ჯანდაცვის სამინისტროს დაავადებათა კონტროლისა და პრევენციის ეროვნული ცენტრის მიერ გამოქვეყნებული ინფორმაციის თანახმად, დაღუპულთაგან ყველაზე ხანდაზმული 85 წლის იყო, ხოლო ყველაზე ახალგაზრდა 62 წლის ქალი.

ამჟამად სომხეთში კორონავირუსით 10 728 ადამიანი მკურნალობს. ჩატარებული ტესტების საერთო რაოდენობაა 89 992.

[რიმა სარუხანიან, ახალციხე]