ქალების 34% მიიჩნევს რომ საბოლოო სიტყვა ოჯახში კაცს უნდა ეკუთვნოდეს – კვლევა

ამავე კვლევის მიხედვით, 2013 წელს კაცების 88% და ქალების 71% თვლიდა, რომ საბოლოო სიტყვა ოჯახში კაცმა უნდა თქვას.

„კაცების უმრავლესობა და ქალების მნიშვნელოვანი წილი კვლავაც მიიჩნევს, რომ გადაწყვეტილების მიღების პროცესში, მათ შორის, ქალების მეგობრებთან დაკავშირებითაც, კაცებს მეტი ძალაუფლება უნდა ჰქონდეთ“, – ნათქვამია კვლევაში.

რაც შეეხება საოჯახო საქმეებს, გამოკითხული კაცების 86% თვლის, რომ ოჯახში სახლის დალაგება და ტანსაცმლის გარეცხვა ქალს ევალება, 74%–ის თქმით საჭმელი ოჯახში ქალმა უნდა მოამზადოს ხოლო ბავშვის მოვლა, 49%–ის აზრით, ქალს ევალება.

„ქალი რესპონდენტების, დაახლოებით, ნახევარი ამბობს, რომ ბავშვზე ზრუნვის პასუხისმგებლობა ყოველთვის მას ეკისრება. იმ ქალი რესპონდენტების გათვალისწინებით, რომლებიც ამბობენ, რომ ბავშვზე „ჩვეულებრივ“ ზრუნავენ, ეს რაოდენობა 70%-მდე იზრდება. კაცების, დაახლოებით, 49% ამბობს, რომ ყოველთვის ან ჩვეულებრივ, ბავშვზე მისი პარტნიორი ზრუნავს. ქალებზე მეტი კაცი ამბობს, რომ ბავშვზე ზრუნვის პასუხისმგებლობა თანაბრად ნაწილდება, მაგრამ ეს რაოდენობა, ჯერჯერობით, მხოლოდ ქალების 28 და კაცების 43 პროცენტს შეადგენს“ – ვკითხულობთ კვლევაში.

გენდერული წარმოდგენებისა და დამოკიდებულებების კვლევა 2019 წელს გაეროს განვითარების პროგრამისა (UNDP) და გაეროს მოსახლეობის ფონდის (UNFPA) დაკვეთითა და შვედეთის მთავრობის ფინანსური ხელშეწყობით ჩატარდა.



[რობი ზარიძე]