ხულო-ზარზმის გზის რეაბილიტაცია იწყება

კომპანიასა და საავტომობილო გზების დეპარტამენტს შორის ხელშეკრულება გუშინ ცხრა ივნისს გაფორმდა.

ხულო-ზარზმის გზის რეკონსტრუქციის ახალი ტენდერი, 2 ნაწილად გამოცხადდა. 5 კმ-მდე მონაკვეთს სახელმწიფო ბიუჯეტი აფინანსებს, ხოლო 42 კმ-იანიანი მონაკვეთი ქუვეითის ფონდის მიერ დაფინანსდება, რომლის ტენდერიც შერჩევა-შეფასების ეტაპზეა.

5 კმ–იანი მონაკვეთის რეაბილიტაცია სამუშაოების დაწყებიდან 18 თვეში უნდა დასრულდეს.

პროექტის ფარგლებში, ჯამში რეაბილიტირდება 47 კილომეტრიანი გზა და 7 ხიდი, დაიგება 2 ზოლიანი ასფალტ-ბეტონის საფარი.

ხულო-ზარზმის განახლებული გზა, სამცხე-ჯავახეთისა და აჭარის რეგიონებს უმოკლესი გზით დააკავშირებს ერთმანეთთან. სარეაბილიტაციო მონაკვეთი დაბა ხულოდან იწყება, გაივლის გოდერძის უღელტეხილს და ადიგენის სოფელ ზარზმამდე მივა. განახლებული გზით, ბათუმიდან ახალციხემდე მგზავრობის დრო 1.5 სთ-ით შემცირდება.

გამოცემა „ბათუმელების“ ინფორმაციით, აქამდე შპს „მამისონი“ აჭარაში კიდევ ერთ მასშტაბურ ტენდერში მონაწილეობდა – ამ კომპანიამ აჭარაში 3,3 მილიონ ლარად „ახალი სასაფლოს“ მოწყობაზე იმუშავა. სასაფლაო დღემდე გამოუსადეგარია და საკითხს პროკურატურა სწავლობს. კომპანია „მამისონში“ „ბათუმელებს“ დაუდასტურეს, რომ საგამოძიებო ორგანომ მათგან შესაბამის დოკუმენტაცია ამოიღო.

სამშენებლო კომპანია „მამისონი“ 2007 წელს თბილისშია რეგისტრირებული და მისი 100 პროცენტი წილის მფლობელია შპს „ევორდ ჰოლდინგი“, რომლის მესაკუთრეებიც არიან თორნიკე, ირაკლი, სოფიკო და ნიკოლოზ ჭკადუები. ირაკლი ჭკადუა კი, შპს „მამისონის“ გენერალური დირექტორია.

[sknews.ge]