საავტომობილო გზების დეპარტამენტი ხულო-ზარზმის გზის მშენებელ კომპანიასთან ხელშეკრულებას წყვეტს

საავტომობილო დეპარტამენტის განცხადებით კომპანიას ყველა პირობა ჰქონდა პროექტის განსახორციელებლად.

„ამ ეტაპზე, გამოთხოვილია ხელშეკრულების შესრულების უზრუნველყოფის გარანტია. რაც შეეხება ხულო-ზარზმის პროექტის განვითარებას, საერთაშორისო საფინანსო ინსტიტუტთან შეთანხმება მიღწეულია და ახალი ტენდერების გამოცხადება მიმდინარე წლის მარტის თვეშია დაგეგმილი“ –წერია დეპარტამენტის მიერ გავრცელებულ განცხადებაში.

ხულო-ზარზმის დამაკავშირებელი გზის ყველაზე მჭიდრიოდ დასახლებული 5 კმ-იანი მონაკვეთის რეაბილიტაცია-რეკონსტრუქცია სახელმწიფო ბიუჯეტიდან დაფინანსდება. ხოლო 2 ლოტად გაყოფილი 42 კმ-იანი მონაკვეთის რეკონსტრუქცია, ისევ ქუვეითის ფონდისა და საქართველოს მთავრობის ფინანსური მხარდაჭერით განხორციელდება.

საავტომობილო გზების დეპარტამენტსა და TODINI COSTRUZIONI GENERALI S.p.A.-ს შორის ხელშეკრულებები ბათუმი (ანგისა)-ახალციხის საავტომობილო გზის ხულო-ზარზმის 2 მონაკვეთის რეაბილიტაცია-რეკონსტრუქციის სამუშაოებზე 2018 წლის ორ აგვისტოს გაფორმდა. 110,2 მილიონი ლარის სამუშაოები, რომელიც არაბთა ეკონომიკური განვითარების ქუვეითის ფონდის მიერ ფინანსდებოდა, მშენებელ კომპანიას 2020 წლის პირველ ოქტომბრამდე უნდა დაესრულებინა.

TODINI COSTRUZIONI GENERALI S.p.A.-ს საავტომობილო გზების დეპარტამენტთან ხელშეკრულება სხვა პროექტზეც ჰქონდა გაფორმებული.
2018 წელს აღნიშნული კომპანია, სამტრედია-გრიგოლეთის ახალი ავტომაგისტრალის მშენებლობაზე გამოცხადებული 30 მილიონიანი ტენდერის გამარჯვებული იყო.

სამუშაოების არაჯეროვნად შესრულების გამო კომპანია საავტომობილო გზების დეპარტამენტმა არაერთხელ გააფრთხილა. საბოლოოდ კი სამტრედია-გრიგოლეთის პროექტი შეჩრდა. იმ პერიოდში, როცა კომპანიამ ხულო-ზარზმის ტენდერში გაიმარჯვა, საავტომობილო გზების დეპარტამენტში უკვე მიმდინარეობდა საუბარი კომპანიისთვის სამტრედია-გრიგოლეთის პროექტზე ხელშეკრულების შეწყვეტასთან დაკავშირებით.

[sknews.ge]