საპატრიარქოს ეკლესიები 20 ჰექტარ ტყეს დაირეგისტრირებენ - კოდექსი დამტკიცდა

79 მომხრე და არცერთი წინააღმდეგი, ამ შედეგით დღეს, 22 მაისს პარლამენტმა „ტყის კოდექსი“ დაამტკიცა.

„ტყის კოდექსის“ მე-15 მუხლი ადგენს მართლმადიდებლური ეკლესიისთვის ტყის გადაცემის შესაძლებლობას: „საქართველოს სამოციქულო მართლმადიდებელ ეკლესიას საკუთრებაში შეიძლება გადაეცეს ამ კანონის ამოქმედებამდე არსებული მართლმადიდებლური ეკლესია-მონასტრების მიმდებარე ტყის ფართობი, არაუმეტეს 20 ჰა თითოეულის შემთხვევაში და საქართველოს ტყის კოდექსით განსაზღვრული მიჩენილი ტერიტორიები“, – ნათქვამია კოდექსში.

ტყის კოდექსსა და სახელმწიფო ქონების შესახებ კანონში დაგეგმილ ცვლილებებს გარემოს დაცვისა და ბუნებრივი რესურსების კომიტეტმა პირველი მოსმენით მხარი 2019 წლის ოქტომბერში დაუჭირა. მესამე მოსმენა კი კომიტეტის სხდომაზე 20 მაისს შედგა. კომიტეტმა ამჯერადაც მხარი დაუჭირა საკანონმდებლო ცვლილებების პაკეტს.
არასამთავრობო ორგანიზაციებმა ცვლილების წინააღმდეგ არაერთი განცხადება გაავრცელეს.

ასევე ტოლერანტობისა და მრავალფეროვნების ინსტიტუტმა (TDI) მიმართა საქართველოს პარლამენტს არ დაუჭიროს მხარი საპატრიარქოსთვის ტყეების გადაცემის კანონპროექტს.

[sknews.ge]