იმნაძე მოუწოდებს მოსახლეობას შიდა ტურიზმის განვითარებისთვის საქართველოს კურორტებზე დაისვენონ

„ზოგს ზღვა მოსწონს და ზოგს მთა, დასვენება დავგეგმოთ გემოვნების მიხედვით. გასაგებია რაც არ უნდა გავხსნათ უცხოელი ტურისტებისთვის ჩვენი კარიბჭეები, მაინც არ იქნება იმდენი. ამიტომ მისასალმებელი იქნება წელს თუ ყველა გამოვიყენებთ ჩვენი ქვეყნის ტურისტულ შესაძლებლობას იმისათვის, რომ მაქსიმალურად ჩვენივე შიდა ტურიზმი განვავითაროთ ქვეყანაში“, – განაცხადა პაატა იმნაძემ.

იმნაძის განმარტებით ტურისტული სეზონის გახსნის რისკი არსებობს, მაგრამ მიმდინარეობს მუშაობა რეკომენდაციებზე.

„მთელს მსოფლიოში კონკურენციაა ვინ დაასწრებს გახსნას. ევროპაში სლოვენიამ გამოაცხადა, საბერძნეთს აქვს გეგმა თავისი კურორტების გახსნის. რა თქმა უნდა ჩვენც უნდა გამოვიყენოთ ჩვენი პოტენციალი, რომელიც ქვეყანას გააჩნია, მითუმეტეს საქართველო ბევრი ქვეყნისთვის იქცა უსაფრთხო იმიჯის ქვეყანად. აქედან გამომდინარე რა თქმა უნდა ამას უნდა გამოყენება და ეს უნდა იყოს ძალიან კონტროლირებადი. ამისათვის გარკვეული მოსამზადებელი სამუშაოები მიმდინარეობს. ტურიზმის საერთაშორისო ორგანიზაციაც მუშაობს ამაზე ეს იქნება ძალიან კონტროლირებადი და მაქსიმალურად დაცული“, – თქვა იმნაძემ.

მან ასევე აღნიშნა, რომ ყველაფერი გაკეთდება იმისთვის, რომ ტურისტმა ქვეყანაში კოვიდინფექცია არ შემოიტანოს. მისი განმარტებით, გარკვეულ პერიოდში გამოქვეყნდება პროტოკოლი და რეკომენდაციები დეტალურად იქნება გაწერილი.

[ნუკა სტეფნაძე]