დღეს ადიგენში ზარზმობას აღნიშნავენ

სახალხო დღესასწაულის აღნიშვნა სერაპიონ ზარზმელის ხსენების დღეს უკავშირდება. დღეს, 11 ნოემბერს, ზარზმის მონასტრის დამაარსებლისა და მისი პირველი წინამძღვრის სერაპიონ ზარზმელის ხსენების დღეა.

სერაპიონ ზარზმელი, რომელიც IX საუკუნეში მოღვაწეობდა, წარმოშობით კლარჯეთიდან იყო. მას ორი ძმა ჰყავდა. სერაპიონის დედა ადრე გარდაიცვალა და შვილები მამამ აღზარდა. რამდენიმე წელიწადში მამაც გარდაიცვალა, სერაპიონი მცირეწლოვან იოანესთან ერთად ოპიზის მონასტერში, მიქაელ პარეხელთან მივიდა და ბერად შედგა, მოგვიანებით კი მიქაელის ბრძანებით მღვდლად იკურთხა.

მიქაელ პარეხელის ბრძანებით, სერაპიონი, იოანე და კიდევ ოთხი ბერი გაემართნენ სამცხისაკენ ეკლესიის საშენებლად და თან წაიღეს ფერისცვალების ხატი, რომელიც ახლად აშენებულ ეკლესიაში უნდა დაესვენებინათ. იმხანად სამცხის დიდი მთავარი, გიორგი ჩორჩანელი, თვითონ ეწვია სერაპიონს და დიდი შემწეობა აღმოუჩინა; მონასტრისათვის უწყალობა მიწა და საშენი მასალა. მშენებლობა სამ წელიწადში დასრულდა. გიორგი ჩორჩანელმა მონასტერს მისცა ჯორ-სახედრები და შესწირა სოფლები. სერაპიონმა დაადგინა მონასტრის ტიპოკონი. სერაპიონი სიცოცხლის ბოლომდე მოღვაწეობდა ზარზმის მონასტერში. დაკრძალულია საკურთხევლის აღმოსავლეთით.

ზარზმობა, სოფელ ზარზმაში, წლებია აღინიშნება. ან დღეს ამ სოფელში ადგილობრივები ადიგენის სხვადასხვა სოფლიდან იკრიბებიან. წირვა-ლოცვის შემდეგ იმართება კონცერტი და ეწყობა მესხური ნიმუშების გამოფენაც.

[sknews.ge]