დღეს ადიგენში ზარზმობას აღნიშნავენ

დღესასწაულის აღნიშნვა ადიგენში დილის 10:00 საათზე, წირვით დაიწყო. წირვა სერაპიონ ზარზმელის სახელობის მონასტერში, ახალციხისა და ტაო–კლარჯეთის მიტროპოლიტმა, მეუფე თეოდორე ჭუაძემ აღავლინა.

წირვის დასრულების შემდეგ, დღესასწაულის კულტურული ღონისძიებების ნაწილი დაიწყო. გასული წლისგან განსხვავებით, წელს, ღონისძიება არა სოფლის ცენტრში, არამედ სოფელ ზარზმის შესასვლელთან იმართება.

„ზარზმის შესასვლელში, არის კარგი ადგილი, ადრეც იქ ტარდებოდა ხოლმე ზარზმობის დღესასწაული და ახალაც მანდ გაკეთდა. ჩვეულებისამებრ, კონცერტში მონაწილეობას ადგილობრივი ანსამბლები მიიღებენ, როგორც ქორეოგრაფიული, ასევე სასიმღრო. გვეყოლება მოწვეული ანსამბლიც“, – განმარტავენ ადიგენის გამგეობის საზოგადოებასთან ურთიერთობის სამსახურში.

მათივე ინფორმაციით, ადგილობრივ ანსამბლებთან ერთად, ადიგენში ზარზმობის დღესასწაულზე მონაწილეობას მიიღებს „ერისიონთან“ არსებული ქორეოგრაფიული ანსამბლი „მომავალი“ , რომლებიც სპეციალურად ამ დღისთვის მომზადებულ ნომრებს შეასრულებენ.
გარდა კონცერტისა, სცენასთან ახლოს გაიმართება ხალხური რეწვის ნიმუშების გამოფენა–გაყიდვა, სადაც წარმოდგენილი იქნება შშმ პირების ნამუშევრები.

ზარზმობის დღესასწაულზე, სცენის სამშენებლო სამუშაოებისათვის, ადიგენის გამგეობამ ტენდერი, 3 061 ლარის ფარგლებში, ოქტომბრის თვეში გამოაცხადა. მასში გამარჯვებული ინდ. მეწარმე ბეგლარ საგინაძეა. იგი სცენის მოწყობისა და ბანერების გაკვრის სამუშაოებს 2 900 ლარის ფარგლებში შეასრულებს.

სატენდერო დოკუმენტაციის მიხედვით, სცენა გამგეობის კუთვნილი 5 სმ სისქის ფიცრით უნდა გაკეთდეს, რომელიც სოფელ უდეში გამგეობის კუთვნილ შენობაში, პირველი საჯარო სკოლის მიმდებარედ არის დასაწყობებული.

სცენაზე მოეწყობა ასასვლელი კიბეები ორი მხრიდან, უკანა მხარეს კი გაიკვრება ცელოფანი, რომლის ფონზეც მოეწყობა ბანერი წარწერით „გილოცავთ წმინდა სერაპიონ ზარზმელის ხსენების დღეს“.

[თაკო ფეიქრიშვილი, ადიგენი]