ადიგენში სერაპიონ ზარზმელის ხსენების დღეს ზეიმობენ

ადიგენში სერაპიონ ზარზმელის ხსენების დღისადმი მიძღვნილი ღონისძიებები 09:30 საათზე სოფელ ზარზმის მონასტრის ტაძარში სადღესასწაულო წირვა - ლოცვით დაიწყო.

ღონისძიებას ინფრასტრუქტურის მინისტრთან ერთად, ადგილობრივი ხელისუფლების წარმომადგენლები, სამცხე–ჯავახეთის გუბერნატორი, მაჟორიტარი დეპუტატი და მოწვეული სტუმრები ესწრებიან.

13:00 საათზე ტაძრის მიმდებარედ კონცეტრი ჩატარდება, 14:30 საათზე მონასტრის სატრაპეზოში მოწვეული სტუმრებს გაუმასპინძლდებიან. 16:30 საათზე კი ადიგენის ცენტრალურ სტადიონზე ფეხბურთის ფედერაციიდან მოწვეულ ვეტერან ფეხბურთელებსა და ადგილობრივ ვეტერანებს შორის გაიმართება საფეხბურთო მატჩი.

შეგახსენებთ, რომ სახალხო დღესასწაულის აღნიშვნა სერაპიონ ზარზმელის ხსენების დღეს უკავშირდება. დღესასწაული ყოველი წლის 11 ნოემბერს აღინიშნება.

სერაპიონ ზარზმელი, რომელიც IX საუკუნეში მოღვაწეობდა, წარმოშობით კლარჯეთიდან იყო. მას ორი ძმა ჰყავდა. სერაპიონის დედა ადრე გარდაიცვალა და შვილები მამამ აღზარდა. რამდენიმე წელიწადში მამაც გარდაიცვალა, სერაპიონი მცირეწლოვან იოანესთან ერთად ოპიზის მონასტერში, მიქაელ პარეხელთან მივიდა და ბერად შედგა, მოგვიანებით კი მიქაელის ბრძანებით მღვდლად იკურთხა.

მიქაელ პარეხელის ბრძანებით, სერაპიონი, იოანე და კიდევ ოთხი ბერი გაემართნენ სამცხისაკენ ეკლესიის საშენებლად და თან წაიღეს ფერისცვალების ხატი, რომელიც ახლად აშენებულ ეკლესიაში უნდა დაესვენებინათ. იმხანად სამცხის დიდი მთავარი, გიორგი ჩორჩანელი, თვითონ ეწვია სერაპიონს და დიდი შემწეობა აღმოუჩინა; მონასტრისათვის უწყალობა მიწა და საშენი მასალა. მშენებლობა სამ წელიწადში დასრულდა. გიორგი ჩორჩანელმა მონასტერს მისცა ჯორ-სახედრები და შესწირა სოფლები. სერაპიონმა დაადგინა მონასტრის ტიპოკონი. სერაპიონი სიცოცხლის ბოლომდე მოღვაწეობდა ზარზმის მონასტერში. დაკრძალულია საკურთხევლის აღმოსავლეთით.

[sknews.ge]