შსს: სამცხე-ჯავახეთში დანაშაულის გახსნის მაჩვენებელმა მოიმატა

შინაგან საქმეთა სამინისტრომ დღეს, 6 ნოემბერს, მიმდინარე წლის 10 თვის დანაშაულის სტატისტიკა გამოაქვეყნა. მონაცემები ასახავს კრიმინოგენულ მდგომარეობას როგორც ქვეყნის მასშტაბით, ასევე, რეგიონების მიხედვით. ანგარიშში ცალკეა ოქტომბრის თვის მონაცემებიც.

შსს-ს სტატისტიკური მონაცემებით 2013 წელს, წინა წლის ანალოგიურ პერიოდთან შედარებით, ქვეყნის მასშტაბით დანაშაულმა 7112 ერთეულით იკლო, რაც 22,7%-ს შეადგენს, ხოლო დანაშაულის გახსნის მაჩვენებელმა 40,6%-ით მოიმატა და 59,1% -ია.
კონკრეტულად, 2013 წლის იანვრიდან ოქტომბრის ჩათვლით, ქვეყნის მასშტაბით მომხდარია 24175 დანაშაული, აქედან გახსნილია - 14285. 2012 წელს, ათ თვეში მომხდარია 31287 დანაშაული და აქედან, გახსნილია - 5789. გახსნის მაჩვენებელი: 2012 წელს - 18,5% , 2013 წელს - 59,1%.

რაც შეეხება კონკრეტულად ოქტომბრის თვეს, 2013 წლის ოქტომბერში ქვეყნის მასშტაბით დანაშაულთა რაოდენობამ 1004-ით იკლო, რაც 27,6%-ს შეადგენს. დანაშაულის გახსნის მაჩვენებელი კი 64,5%-ია და 2012 წლის ანალოგიურ პერიოდთან შედარებით 56,3 %-ით მოიმატა. კონკრეტულად, 2013 წელი, ოქტომბერი, ჩადენილი დანაშაული - 2640, გახსნილი - 1703. 2012 წელს, ჩადენილი - 3644, გახსნილი - 298. გახსნის მაჩვენებელი 8,2%.

რაც შეეხება სამცხე-ჯავახეთს, 2013 წელს, ოქტომბერში, მომხდარია 66 დანაშაული და აქედან, გახსნილია 55. გახსნის მაჩვენებელი: 83,3%. გასულ წელს, ანალოგიურ პერიოდში მოხდა 63 დანაშაული და აქედან გაიხსნა 12. გახსნის მაჩვენებელი: 19%.

დეტალური ანგარიში ქვეყნის რეგიონების მიხედვით შეგიძლიათ იხილოთ ამ ბმულზე.

[SKnews.ge]