ვანო მერაბიშვილი: 'დღეიდან მე მხოლოდ რამდენიმე პროცესს დავესწრები'

ვანო მერაბიშვილმა რამდენიმე წუთის წინ სპეციალური განცხადება გაავრცელა, რომელშიც მოსამართლეს მიმართავს და აღნიშნავს, რომ ქუთაისის სასამართლომ არასწორი გადაწყვეტილება უკვე არაერთხელ მიიღო.

"ჩემი აზრით, ქუთაისის სასამართლომ უკვე არაერთგზის მიიღო უკანონო გადაწყვეტილება - ჩემთვის წინასწარი პატიმრობის შეფარდება, წინასასამართლო სხდომაზე აღკვეთის ღონისძიების ძალაში დატოვება და სასამართლო პროცესებზე ბრალდებისთვის 4000-მდე მოწმის დაკითხვის საშუალების მიცემა", - წერს ვანო მერაბიშვილი.

მიმართვაში ნათქვამია, რომ ვანო მერაბიშვილი ყველა სასამართლო პროცესზე დასწრებას არ აპირებს, რადგან მისთვის რთულია თბილისიდან ქუთაისში სიარული.

"წინა სასამართლო სხდომაზე მე აგიხსენით, რომ ჩემთვის რთულია თბილისიდან ქუთაისში სიარული და გთხოვეთ, რომ არ ჩაგენიშნათ კვირაში ერთზე მეტი პროცესი, რის პასუხადაც თქვენ განაცხადეთ, რომ საჭიროების შემთხვევაში კვირაში სამ პროცესსაც კი ჩაატარებდით. თქვენმა განცხადებამ საბოლოოდ დამარწმუნა, რომ ქუთაისში მე არ უნდა ველოდო სამართლიან სასამართლოს. ამიტომ, მე გადავწყვიტე შევწყვიტო ქუთაისის სასამართლოში სისტემატური სიარული და საზოგადოების ყურადღება მივაპყრო ამ საკითხს. დღეიდან მე მხოლოდ რამდენიმე პროცესს დავესწრები", - აღნიშნავს ვანო მერაბიშვილი.

[sknews.ge]